Хомосексуалци

Во светот јавно се бакнуваат, нашите никаде ги нема

Во Македонија постои социјален живот на ЛГБТ луѓето, кој се' уште е невидлив

Жаклина Ѓорѓевиќ

Двесте шпански хомосексуалци со бакнеж го поздравија доаѓањето на папата Бенедикт Шеснаесетти додека поминуваше во својот папмобил низ улиците на Барселона. Бакнежот го симболизираше нивниот револт и протест поради неговата политика за хомосексуалците и употребата на кондоми. Во Србија се' уште се раскажува за парадата на хомосексуалците и контрапарадата од минатиот месец, кои завршија со над стотина повредени. Жител на албанскиот град Лежа отворено призна дека е хомосексуалец во емисијата „Биг брадер“, која се емитува на телевизијата Топ чанел, при што експресно предизвика протест на 400 млади луѓе. Хомосексуалците во светот од поодамна, а во поново време и од регионов, отворено признаваат каква е нивната сексуална определба. Министри, пратеници, градоначалници... од речиси сите светски дестинации од ист пол се мажат, се женат и немаат никаков проблем зашто нивните сограѓани и соработници знаат дека се хомосексуалци.

Но, за разлика од светските трендови, нашите хомосексуалци ги нема никаде. Никој не признава дека има поинаква сексуална ориентација, иако низ градските седенки не стивнуваат озборувањата за тоа кој е или не е хомо од повеќе или помалку популарните ликови.

Веќе три години не функционира Македонската асоцијација за слободна сексуална ориентација МАССО и оттогаш никој не зборува за луѓето од ЛГБТ-популацијата. Се кријат ли, каде исчезнаа?

Во Македонија се се' заврши со приказната за Кочо Андоновски, човекот кој е единствениот досега што призна јавно дека е хомосексуалец. Сега работи во Хелсиншкиот комитет за човекови права. Тој вели дека тоа што ја нема организацијата, не значи дека ЛГБТ-луѓето не постојат.

„Моментно МАССО не е активна. Нема активна организација која е посветена на правата на ЛГТБ-популацијата и која континуирано работи на правата на лезбијките, геј, бисексуаците и трансродните личности“, вели Андоновски, некогашниот претседател на МАССО.

Според него, МАССО ја извршила својата улога за отворање дебата во однос на сексуалната ориентација и човековите права. „Затоа е потребно самоорганизирање на ЛГБТ-луѓето и формирање нова организација“ коментира тој.

Бакнежот на хомосексуалците во Барселона Андоновски го коментира како нормална реакција на луѓе „што трпат континуирано говор на омраза од страна на Католичката црква“. „Тоа е еден апел во име на слободата на правата на сите луѓе. Како што верниците имаат права на свое религиско уверување, имаат и ЛГБТ права во однос на недискриминација врз основа на сексуална ориентација“, смета Андоновски.

На прашањето каде се изгубија хомосексуалците, тој објаснува дека во Македонија постои социјален живот на ЛГБТ луѓето, кој, за жал, се' уште е невидлив. Сепак, прогнозира дека за една-две години ќе има позрела и самоорганизирана ЛГБТ-заедница, која ќе биде подготвена јавно да се бори за своите права.

Моментно Хелсиншкиот комитет дава бесплатна правна помош за сите оние што се чувствуваат дискриминирани по каква било основа.

Славчо Димитров, координатор на „Коалицијата за промоција и заштита на сексуалните и здравствените права“ го оценува протестот на шпанските хомосексуалци како еден од подобрите што ќе ги памети човештвото. „Со тоа му се упати јасна порака на папата дека се залудни сите напори на Црквата да го избрише постоењето на одредена група луѓе“, ни изјави Димитров. Тој додава дека има јавни личности што се хомосексуалци, но тие се принудени да водат двоен живот на кој се присилени од општествотож. Притоа, смета дека проблемот со нивното непојавување во јавноста лежи во тоа што генерално нема политичко освестување за таа проблематика во земјава.

Македонија доживува критики од Европската унија дека законот за антидискриминација не е во согласност со европското законодавство.


Македонци одат во Белград да го менуваат полот?

Неколку транссексуалци од Македонија бараат да го променат полот, но тоа планираат да го сторат во Белград, а не во државава, за да се заштитат од јавна осуда, дознаваме од неофицијални извори. Со тоа и нивниот идентитет, кој засега се чува во строга тајност, ќе мора да се промени во личните документи што ги поседуваат.

За разлика од досегашните случаи кога вакви личности го менувале полот и поради тоа заминувале надвор од државава, овие неколку старо-нови ликови решиле да останат во Македонија и тука да продолжат да живеат со новиот идентитет.

Невладини организации нудат бесплатна правна помош за сите оние што ќе се одлучат на овој чекор.