На средбата на Груевски со Баросо присуствуваше и еврокомесарот за проширување Оли Рен

Од нашиот дописник
Слободанка Јовановска


Брисел - Претседателот на Европската комисија, Жозе Мануел Баросо, остана вчера без добрата вест од Македонија и по средбата со Груевски само можеше да порача дека има можност да се надмине спорот околу името ако и двајцата политички лидери на Грција и на Македонија покажат вистинска политичка волја за тоа.

Премиерот Груевски тврдеше дека прави се' што може од своја страна да се реши спорот, но нервозните лица на членовите на делегацијата и на домаќините сугерираа каква била средбата во Брисел. „Направив се' што е во мој капацитет и ќе правам и натаму да се реши спорот во интерес на сите граѓани, Македонци или Албанци“, изјави Груевски на прес-конференцијата. Прашан дали гледа простор за отстапки од Грција, тој одговори позитивно. „Верувам дека има многу простор грчката влада да биде флексибилна и да дозволи почеток на преговорите за Македонија. Разговорите за спорот можат да бидат паралелни, бидејќи Грција има можност да не' блокира 70 пати. Подготвени сме за интензивни преговори“, рече тој со оценка дека блокадата на преговорите не помага за подобрување на односите меѓу двете земји.

Премиерот најави дека ќе се обидува и натаму да најде решение за спорот со Грција, но на прашањето дали е можно да се случи тоа до идната недела, тој призна дека нема сериозен напредок во преговорите засега. Тоа е веста што ја посакуваше Брисел најмалку за средбата, но пораката на Баросо беше дека таа цел е остварлива ако има волја за тоа.

Малку надеж има дека до 7 декември ќе се реши проблемот со името и Македонија ќе добие датум за преговори со ЕУ. Тоа е впечатокот од вчерашните разговори на македонскиот премиер Никола Груевски и претседателот на Европската комисија, Жозе Мануел Баросо.

На прес-конференцијата по средбата, Баросо им честиташе на граѓаните на Македонија за перспективите. „Tреба да кажеме дека мора да се реши проблемот за името еднаш и засекогаш и сега можете да и' покажете на Европа дека сте подготвени да го сторите тоа. Убеден сум дека сега е вистинската можност да се покаже политичка желба од двете страни да се надмине овој проблем. Членството на ЕУ е многу важна работа за вашата земја, како и за влезот во НАТО. Го поддржувам г. Груевски да продолжи со одржување на исполнетите критериуми и со реформите во јавната администрација“, рече Баросо.

Според Груевски, Македонија ги исполни сите неопходни критериуми за добивање датум за почеток на преговорите, што е забележано од страна на Европската комисија во нејзините последни препораки. „За ова сме благодарни и ја цениме улогата на Комисијата. Остануваме посветени на европската агенда и напорно ќе продолжиме да работиме за оваа цел и ќе се трудиме да дојдеме до решение и за прашањето поврзано со спорот што го отвори Грција за нашето име“.

На прашањето на Ројтерс дали има нови договори на маса како решение во спорот со името, Груевски одговори дека „во последниов период има многу интензивни дискусии на различни нивоа меѓу Македонија и Грција. Дијалогот е етаблиран многу подобро отколку претходно, но немаме сериозен прогрес“.

Дописникот на грчката телевизија го праша Груевски дали верува дека која било грчка влада во иднина ќе маневрира и ќе се врати чекор назад во преговорите за името? Груевски верува дека „грчката влада може да биде многу пофлексибилна и да продолжи со интензивни дискусии. Грчката влада има можност да не' блокира во секое време, но блокирањето нема да покаже ништо, како што беше случајот и со НАТО“.

Во пресрет на средбата на Груевски со Баросо и со Рен, во политичките кругови во Брисел се подгреваше надежта дека е можно во последен момент да дојде добрата вест за Македонија, а таа зависеше од вестите не од Скопје, туку од Атина, каде што беа шведскиот претседавач со ЕУ, Карл Билт, и вториот човек на американскиот Стејт департмент, Џемс Штајнберг, кои вршеа притисок врз грчкиот премиер да си го одработат нивниот дел од компромисот.

На македонска страна доминираше скептицизмот и неофицијално се очекуваше драмата околу 7 декември да заврши само со нотирање на прогресот на Македонија и на препораката, со додавка дека одлуката ќе се носи во иднина. Неофицијално, исто така, се најавуваше дека македонскиот премиер ќе го извести Баросо што прави Македонија да се реши спорот и до каде е стигнато во барањето компромис, бидејќи пораките утрото од Атина беа дека не се откажуваат од ветото ако нема решение за името.

Пред средбата со Баросо и Рен, премиерот Груевски се сретна со заменик-премиерот на Холандија, Андре Роувет, кој учествуваше во молитвениот појадок на парламентарците од народните партии. Тој како и останатите даде поддршка да се реши спорот околу името и поскоро да и' се даде датум за преговори со ЕУ на Македонија, нешто што не е проблем да ни го дадат сите, но не ја решава ситуацијата. Поддршка за датумот на средбата со Груевски дал и известувачот за Македонија, Зоран Талер, но тој не сакаше да дава дополнителни изјави додека не го види крајот од средбата со Баросо и Рен.