Интервју

Сигурен сум дека ќе влезам во финалето

Ѓоко Танески

Македонскиот евровизиски претставник завчера отпатува со автомобил за Осло. Првиот прес и проба го очекуваат на 17 мај

Катерина Шекеровска

Следен со полициска придружба до излезот од градот и поддршка на повеќе фанови завчера, точно напладне Ѓоко Танески со автомобил го започна своето патешествие до Осло, Норвешка, каде што од 25 до 29 мај ќе се одржи изборот за Песна на Евровизија. Нашиот евровизиски претставник кој ќе ја пее песната „Јас ја имам силата“ патува во друштво на својот рапер Били ѕвер и ПР- асистентката Ема Темелковска. Првата средба со новинарите и техничката проба на импозантната сцена во „Теленор арената“ го очекуваат веќе на 17 мај.

Влијае ли врз тебе целокупната атмосфера пред тргнувањето?

„Јас сум нов во оваа работа. Не мислев дека ќе биде вака, но ете... За мене е се' ново. Што се однесува до мене, јас мојата работа си ја терам максимално колку што можам заедно со мојот тим и ПР. Ние си ја завршивме нашата работа, а сега како и со што ќе одиме, вакви или онакви знаменца или друг промотивен материјал, тоа е пропуст на други, а не наш.“

Како течеа подготовките за „Евросонг“? Подготвен ли си за Осло?

„Јас сум секогаш подготвен. Пеењето не ми е проблем, напоредно се подготвував и за концертот што се одржа во саботата вечер и за настапот во Осло. Вежбавме заедно со девојките кои ќе бидат со мене на сцена и кои ќе го понесат товарот околу кореографијата, а моја должност е да ја испеам песната како што треба. Сите сме во координација и ќе биде интересно на сцена. Мислам дека енергијата веќе ја имаме и дека ќе ја пренесеме на 25 мај.“

Почнаа ли пеперутките во стомакот, имаш ли трема од толку голема сцена?

„Немам трема. Сум бил на таа сцена како придружен вокал со Мартин Вучиќ, иако сега, секако, товарот е поголем како вокал, но, во секој случај, сум релаксиран од таа страна. Доколку го знам текстот, а го знам, нема да има никаков проблем.“

Со каква кореографија ќе настапиш?

„Не знам како да ја опишам кореографијата. Во секој случај, јас ќе бидам во преден план и ќе пеам, а девојките ќе играат, ќе лазат околу мене, имам и јас некое отфрлање, ќе биде интересно...“

Колку килограми ослабе?

„Не знам, не сум се мерел. Самото трчање и обврски пред „Евросонг“ си го направија своето.“

Ќе дојде ли семејството со тебе во Осло како поддршка?

„Ќе патувам со автомобил заедно со раперот Били Ѕвер и мојата асистентка. Патувањето и возењето воопшто не ми се проблем, напротив, уживам. Мојата ќеркичка нема да дојде зашто е многу мала, а патот е долг. На првата полуфинална вечер кога настапувам ќе пристигне сопругата заедно со моите браќа и внуци, така што на 25 мај ќе имам убава семејна поддршка од првите редови во арената „Теленор“.

Сметаш ли дека неколкуте промотивни патувања беа доволни за твоја промоција?

„Не направивме доволно, но што е - тука е. Одам со сета позитивна енергија и во Осло ќе дадам се' од себе!“

Какви се твоите очекувања?

„Очекувам, односно сигурен сум дека ќе влезам во финалето и мислам дека ќе се пласиран во погорните места.“

Кои се твоите фаворити?

„Секогаш кажувам дека Македонија ми е фаворит! Има добри песни, не е дека нема, но на таа сцена таму се' е релативно и неизвесно до самиот крај.“

Од кого се чувствуваш најзагрозен во првата полуфинална вечер?

„Не знам. И во нашата вечер има моќни држави што сигурно излобирале влез во финалето. Се надевам дека ќе бидам во првите 10, а ако влезам, гарантирам висок пласман.“

Какви се твоите впечатоци по неодамнешниот солистички концерт во Универзална сала, која беше полупразна?

„Концертот помина како што помина, не сум баш задоволен. Повеќе не би коментирал.“

Која е твојата порака пред стартот на „Евросонг“?

„Би сакал на луѓето во дијаспората да им порачам да бидеме единствени, да се соберат на таа вечер и да испраќаат што повеќе пораки со што ќе придонесат за наш влез во финалето.“