Полицајците на улица поради Уставен

Околу 1.000 припадници на полицијата вчера излегоа на улица, изразувајќи револт по одлуката на Уставниот суд, кој го укина законското решение полицајците да се пензионираат со 40 години стаж и пензија од 80 проценти од платата. Полицајците, кои тврдат дека со одлуката на Уставен е погазено достоинството на нивната професија, најпрво се собраа пред Уставен суд, продолжија пред Собранието и завршија пред зградата на МВР.Претседателот на Македонскиот полициски синдикат, Тихомир Климовски, рече дека нема да се откажат од намерата нивните колеги достоинствено да заминат во пензија.„Им се лутиме на оние што не се политичари, а се однесуваат полошо и од политичарите. Но, кога токму од нив ќе слушнете дека не веруваат во судскиот систем на Македонија, кога ќе го дознаете нивното темно минато, едноставно ,немаат доверба во она што го кажуваат или она што го чинат“, им рече Климовски на насобраните полицајци.Уставен суд ги укина двата члена од Законот, сметајќи дека полицијата се става во попривилегирана положба од другите. (Х.Р.)