Хеликоптерот паднал поради редица пропусти

Владата го разгледа извештајот за несреќата. Обемното досие ќе оди во Обвинителството

Даниела Трпчевска

Во 3 часот вчера изутрина Владата го разгледа извештајот за падот на армискиот хеликоптер „МИ-17“, при што загинаа 11 припадници на АРМ. Лошите временски услови, непочитувањето на процедурите за инструментално слетување, неисправните инструменти и одредени пропусти во обуката на мировниците, се само дел од причините што се посочуваат во обемниот извештај како пресудни за падот на воздухопловот.

Во мирна атмосфера, со неколку дополнителни прашања, министрите ставиле крај на едногодишната предистражна постапка за утврдување на причините за несреќата која се случи кај катлановско Блаце. Досието за хеликоптерот ќе биде доставено до скопското Обвинителство.

Како што неофицијално дознаваме, засега на него ќе остане ознаката класифициран документ. Нема најави кога јавно ќе биде обелоденет овој обемен извештај на државната Комисија за спречување несреќи и сериозни инциденти во воздухопловството.

Семејствата на загинатите мировници во сабота ќе ги посетат вечните живеалишта на нивните најмили, во пресрет на едногодишнината од кобната несреќа кај катлановско Блаце, која се случи на 12 јануари. Тие се' уште чекаат да ги дознаат причините за смртта на своите најмили.

Информациите што беа објавени досега во јавноста укажуваат дека војниците воопшто не требало да полетаат од базата „Бутмир“ во Сараево. Тоа утро времето било лошо, со магла и намалена видливост, што требало да биде доволна причина за да се одложи полетувањето кон Скопје. Исто така, се посочува и дека била донесена погрешна одлука, со тоа што не им било овозможено со автобус да се вратат во Скопје.

За курцшлусот да биде уште поголем, екипажот на само неколку километри пред слетувањето на аеродромот „Александар Велики“, се соочил со неисправни инструменти.

Неофицијално, извештајот посочува дека бил неисправен или, пак, можеби не бил вклучен Мод Ц на транспондерот, но проблеми имале и со радарот и САНДЕЛ-от, поради што не можеле да ја применат процедурата за инструментално слетување.

Така во услови на магливо и лошо време, со неисправни инструменти, по третото свртување над брдото, на 1.300 метри, армискиот хеликоптер изгубил контрола, отстапил од маршрутата на движење и удрил во околните дрвја, по што се запалил.

Но, на овој кобен настан му претходеле и низа други проблеми и сплет на околности, кои според сознанијата на Комисијата, довеле до несреќата. Пред да тргнат на пат во мисијата АЛТЕА во Босна, ��ировниците се соочиле со нарушени меѓучовечки односи, на што укажуваа и нивните семејства, што исто така е дел од мозаикот за целиот случај.

Семејствата на загинатите повеќепати изнесуваа забелешки и за текот на истрагата, посочувајќи дека самите на местото на несреќата пронашле делови од хеликоптерот, како и една од црните кутии, која била оставена во фиока во вингот. Дел од овие пропусти, како што дознаваме, биле уочени и од страна на членовите на државната Комисија.

Исто така, дошле до сознанија за одредени пропусти при модернизацијата на хеликоптерите, за кои, како што тврдат нашите извори, не била побарана согласност од производителот на хеликоптерот. Истрагата утврдила и дека не бил склучен договор со овластена сертифицирана фирма за вршење на поправките на хеликоптерот, туку, наводно, биле правени од фирми кои не се овластени за тоа.

Како што неофицијално дознаваме, истрагата утврдила дека во хеликоптерот немало карго-товар со опасни материи и оружје, а исто така е отфрлена и можноста дека хеликоптерот бил насилно соборен.

Во несреќата која се случи утрината на 12 јануари, животот го загубија потполковник Тони Спасовски, мајор Горан Ристовски, капетаните Бране Спасовски и Игор Ѓорески, заставниците Славчо Василев и Тони Давитковски, постарите водници Јанко Шириќ, Мики Ивановски, Александар Тасковски и Александар Васиќ и десетарот Златко Вељановски.