Интервју

Да не го користат „Космос“ за дневнополитички поени

Миле Јанакиески, министер за транспорт и врски

Единствена причина зошто го прифатив новиот мандат е вербата во Груевски и во тимот што го состави, вели Миле Јанакиески, министер за транспорт и врски

Билјана Ангеловска

Вашиот нов мандат е изненадување за многумина. Иако важевте за еден од најблиските соработници на премиерот, сепак, се говореше дека нема веќе да бидете министер.Што беше пресудно повторно даја прифатите министерската функција?

Шпекулациите се веќе минато. Сакам да потенцирам дека и натаму останувам активен член на ВМРО-ДМПНЕ и ќе се залагам за реализација на партиската програма посебно во делот на инфраструктурата која во најголем дел е дел од новата владина програма. Да се биде член на Владата речиси пет години, за мене преставува голем предизвик, но, во исто време и голема обврска. Кога си министер мораш да се откажеш од многу приватни работи, како што е времето поминато со семејството, или слободен викенд, но, од друга страна, фактот дека можеш да решиш голем број проблеми и да реализираш проекти кои ќе останат запаметени со генерации, дава стимул и енергија да продолжиш понатаму. Единствена причина заради која го прифатив новиот мандат е вербата во Груевски и тимот кој тој го состави, во насока дека можеме да ја подобриме економската и општата состојба во Македонија. Континуитетот е битен кога се планираат голем број проекти. Започнат е проектот за реновирање на аеродромите, реконструкцијата на 250 километри локални и над 350 километри регионални патишта, инвестиции во водоводната и фекалната инфраструктура во висина од 50 милиони евра, изградба на патниот правец Табановце- Куманово и други 4 патни правци. Во фаза на реализација е изградбата на Коридорот 10, кон крајот на август или почетокот на септември се очекува да започне постапка за избор на компанија која ќе го гради ��стиот. Оваа година ќе завршиме со проектирањето на документацијата за гасификација на Македонија, а наредната следи почеток на нејзината реализација, изградба на станови и куќи за сите категории граѓани, подготовки за исклучување на аналогното телевизиско емитување и воведување дигитален пренос и ТВ продукција, обновување на патничкиот и товарниот возен парк на АД МЖ Транспорт, рехабилитација на поголемите железнички станици во државата.

Во текот на минатиот мандат се соочивте со непријатен извештај на Државниот ревизор, кој, сепак, помина без никакви последици за Вас, но и за било кој во Министерството. Што се случи со тој извештај, дали МВР работи на таа приказна, или го затвори случајот?

Извештаите на ревизорот претставуваат коректив на работата на институциите и јас лично сметам дека нивните забелешки не смеат да се игнорираат. Јасно е дека по нив мора да се постапува. Да, точно е, добивме одредени забелешки, притоа ги корегиравме посочените пропусти. Јасно е дека вашето прашање за овој извештај доаѓа поради шпекулациите што во тој период во медиумите најчесто ги пласираше еден пратеник од опозицијата, кој изврши личен атак врз мене како министер, тврдеше дека има манипулација со парите во министерството. Да ве потсетам дека обвинувањата се покажаа како неточни! Јас лично извештаите и сета документација ги доставив до Антикорупциската комисија, но и до Јавното обвинителство. Тоа беше институционален пат да се стави крај на невистините што се лиферуваа. Откако двата органа спроведоа истрага, констатираа дека во извештајот нема никакви спорни моменти што би подлежеле на кривична или прекршочна санкција. Вистината е дека најголемиот дел од парите за кои опозицијата зборуваше дека се предмет на манипулација, всушност, со владина одлука беа префрлени од Министерството за транспорт на сметката на Јавното претријатие за стопанисување со станбен и деловен простор, задолжено за изградба на стадионот „Филип Втори“. И, верувајте кога некој ќе го спомене тој, како што велите „непријатен извештај“, кај мене се будат пријатни чувства. А знаете зошто? Затоа што ме потсетува дека Министрството во целосно законска и легална постапка реализираше уште еден проект, изграден е грандиозниот стадион, достоинствен за македонските спортисти.

Во полн ек е имплементацијата на Законот за легализација на бесправната градба и откупот на дворовите. Како сте задоволен од досегашниот тек?

До сега ниту една владејачка гарнитура не го реши овој долгогодишен проблем. Како што е познато крајниот рок за поднесување барање за легализација е 3 септември. До сега во сите општини во државата поднесени се вкупно 89.553 барања, а доделени се 4.612 решенија. Ние очекуваме во наредниот период, како што се ближи крајниот рок бројот на лицата што ќе поднесат барање значително да се зголеми. За таа цел повторно апелирам до граѓаните да не го чекаат крајниот рок, затоа што сериозно размислуваме да не го продолжиме овој рок и да има парични санкции за лицата што не поднеле барање. Ги повикувам сите градоначалници да формираат тимови, кои од куќа во куќа, од фирма во фирма, на терен, дополнително ќе им го објаснуваат процесот на граѓаните.

Деновиве е во тек уривањето на комплексот „Космос”. Колку реално има недоследности во изградбата на овој објект и можеше ли да се стори нешто за да се избегне тоа?

Било кој случај вклучително и „Космос“ не треба да се користи за дневнополитички поени. Сите ние без разлика дали сме министри, пратеници, директори треба да ги почитуваме законите. Доколку не сме задоволни од одлуката на било кој орган, имаме право на жалба пред домашните судови, а ако не сме задоволни од нивните одлуки и пред меѓународни. Воспоставување правна држава е важно за сите граѓани во државата, а сите ние носиме одговорност за одлуките и постапките што ги правиме.

Што се случи со тендерот за давање под концесија на патиштата? Зошто два пати се пролонгира рокот, нема доволно заинтересирани фирми?

Министерство го води процесот за избирање концесионер за проектот за концесија со изградба, реконструкција, одржување, наплата на патарина и користење на дел од државните патишта. Станува збор за патните правци, што се долж патниот Коридор 8 во Македонија поделени во два пакета. По завршување на постапката за евалуација на доставените барања во првата фаза, Комисијата утврди дека 5 компании ги исполниле условите за учество во понатамошната постапка. Во однос на продолжување на рокот, Владата донесе одлука со која се овозможува продолжување на рокот за доставување на понудите во втора фаза и тој рок е 13 септември 2011 година. Рокот е продолжен од причини што според Законот за спречување на корупција, во период на избори и техничка влада не е дозволено отуѓување или издавање на државен капитал.

Кога Министерството конечно ќе се зафати да направи нешто во железницата? Во тој дел се' е во катастрофална состојба. На што ќе му дадете приоритет?

Покрај редовното одржување на пругата кое се врши непрекинато во изминатиот период, веќе се обезбедени 17,6 милиони евра од Европската банка за обнова и развој за ремонт на 54 километри од пругата на коридорот 10. Очекувам до крајот на годинава да биде склучен договор со избраната градежна фирма за делниците Табановце-Куманово (12 км) и Миравци Смоквица (12 км) и работите да започнат во почетокот на 2012 година. Иста постапка ќе се спроведе и за избор на фирма за ремонт на делницата од Ногаевци-Неготино (28 км) и очекувам договорот да биде склучен до средината на 2012 година, а градежните работи да завршат до крајот на 2013 година. Во делот на железничката инфраструктура планираме да се обезбедат средства во висина од 5,7 милиони евра од ИПА фондовите и тоа за изработка на техничка документација за реконструкција на делницата Куманово-Дељадровци, реконструкција на постојната траса Драчево–Велес, за рехабилитација на пругата Битола - Кременица, за модернизација на железничка станица во Скопје. Со ревидираната Оперативна програма за регионален развој за период 2010-2011, за средства од околу 24 милиони евра се предложени проектите за рехабилитација, надградба и реконструкција на железничките станици по должина на Пан-Европскиот Коридор 10, ремонт со реконструкција на повеќе делници. Што се однесува за делот кон Бугарија, во тек изработка на физибилити студија и студија за оценка на влијанието на животната средина и социо-економск��от живот. Веќе обезбедивме 1,5 милиони евра грант за изработка на основни проекти за рехабилитација на првата делница од Куманово до Бељаковце. Очекувам дека до крајот на оваа година договорот со избраниот проектант ќе биде склучен, а до средината на 2012 година, проектите ќе бидат изработени.

Од јули државата почна да им го предава на општините државното неизградено земјиште. Колку општини досега го преземаа управувањето и кои?

Од вкупно 85 општини заедно со Град Скопје, 48 општини го исполнуваат условот за доволен број вработени лица кои се здобија со потврда за положен стручен испит. Од овие 48 општини до сега до Комитетот за градежно земјиште се имаат обратено општините Гевгелија, Карпош, Кочани, Струмица, Велес и Демир Капија. Овие шест општини имаа доставено некомплетна д��кументација која се бара согласно законот и до нив е испратено барање за нејзино докомплетирање. По доставување на потребните документи, Комитетот за градежно земјиште ќе достави предлог до Владата за пренесување на правото за управување со градежното земјиште од страна на овие општини. Досега ниту една општина ги нема исполнето условите и критериумите од Законот за градежно земјиште и нема добиено овластување да управува со државното градежно земјиште. Морам да истакнам дека нашите очекувања беа дека поголем број општини ќе ги исполнат условите за управување. Во наредниот период очекуваме општините да ги исполнат критериумите и да може да го превземат управувањето со земјиштето.

Коридорот 10 - напролет

До каде се работите околу доизградбата на Коридорот 10, останати се само уште 20-тина километри од Демир Капија до Смоквица. Што ја одолговлече толку многу изградбата?

Очекуваме оваа пролет да започнат градежните работи за изградба на автопатската делница од Демир Капија до Смоквица во должина од 28 километри со проценета вредност на градежните работи од 254 милиони евра. Со изградбата на оваа делница целиот Коридор 10 кој поминува низ Македонија ќе биде на ниво на автопат. Со тоа ќе се оствари функцијата на транзитен паневропски коридор и двигател на економијата.