Претходен број

Буџет по мерка на ВМРО-ДПМНЕ и ДУИ

Усвојувањето на ребалансот помина без пратеничката група на СДСМ, која ја напушти седницата

Александрија Стевковска

Собранието вчера по предлог на Владата експресно го стави на дневен ред разгледувањето и го усвои ребалансот на Буџетот за 2008 година и покрај забелешките на опозицијата за прескокнување на законската процедура.

Усвојувањето на ребалансот помина брзо, со прифаќање неколку амандмани предложени од пратеници на ВМРО-ДПМНЕ и повлекување на сите предложени амандмани од страна на ДУИ. Покрај противењето на опозицијата, народните пратеници ги изгласаа измените и дополнувањата на Буџетот за 2008 година, со што обезбедија плус 260 милиони евра за расходите на државата. Позициите на владејачката партија во насока на одобрување на ребалансот се темелат на зголемената реализација на даночните приходи, очекуваниот поголем прилив на уплата од дивиденда од „Македонски телеком“, како и очекувани зголемени приливи од концесии и приватизација. Според предложените измени, вкупните приходи се планирани на износ од 144 милијарди и 706 милиони денари, вкупните расходи се на ниво од 150 милијарди и 371 милион денари, а дефицитот е оценет на 5 милијарди и 665 милиони денари и е во рамки на проекцијата од 1,5 проценти од бруто-домашниот производ.

Министерот за финансии Трајко Славески појасни дека приходите бележат зголемување за 12,4 отсто во однос на проекциите и оти тоа се должи на реалните остварувања во првата половина од годината, кои се за 10,25 проценти над планираните очекувања. Според него, измените на Буџетот се антиинфлаторни, наспроти обвинувањата на експертите и опозицијата дека се работи за проекција на трошење пари која само ја подгрева инфлацијата. Според министерот за финансии, секое трошење кое има реално обезбедени приходи не претставува притисок врз инфлацијата, туку обратно, односно зголемените капитални расходи може да имаат позитивен ефект врз забрзување на економскиот развој. Според министерот Славески, ревидираните проекции не предизвикуваат поместувања на дефицитот и тој е во рамки на 1,5 отсто од БДП.

„Одржувањето вакво ниво на дефицитот ќе има позитивен антиинфлациски ефект врз стабилизирањето на цените и значителна поддршка на режимот на фиксен девизен курс и зголемување на кредибилитетот на државата во меѓународни рамки“, изјави Славески.

На ова тврдење се спротивстави Игор Ивановски од СДСМ, кој потенцираше дека полниот буџет со кој се фали Владата значи сиромашни фирми и граѓани.

„Ова е прв пат техничка влада да предлага Буџет, изготвен без поддршка од коалициониот партнер ДУИ. Со овој ребаланс партијата на власт сака да си обезбеди екстра-пари само за себе. Освен тоа, Славески испомеша термини, периоди на споредување на бројки за БДП, индустриско производство, инфлација, со што практично владејачката партија си ги објаснува работите како што самата сака да ги претстави“, истакна Ивановски.

За Ивановски е дискутабилен начинот на полнењето на Буџетот и тврдењето на Владата дека тоа е резултат на подобрените економски перформанси и повисокиот животен стандард.

Јован Манасиевски од ЛДП го оцени ребалансот на Буџетот како изборен. Тој имаше забелешка дека Владата со ребалансот си доделила дополнителни 350 милиони денари, со што си ја финансирала изборната кампања.