Се исправија два стражарски лава на мостот „Гоце Делчев“

Деновиве се очекува да се монтираат и преостанатите два лава

Деспина Трајковска

По неколкумесечно исчекување, без многу помпа и официјален чин, со уверување дека нема да ја нарушат статиката на мостот „Гоце Делчев“, вчера се поставија двата од четирите лава, кои се дел од владиниот ��роект „Скопје 2014“. Лавовите во стражарска положба, излеани во бронза, секој тежок по пет тони, долг пет метри, а висок седум метри, дело на сопружниците Елена и Дарко Дуковски, почнаа да се монтираат на три и полметарските мермерни постаменти уште в зори. Екипа од италијанската леарница „Фердинандо Маринели“, каде што се лееја скулптурите вршеше нивно фиксирање на самото место под будно око на еден од авторите. Се очекува конечниот замислен лик на лавовите да биде готов до 8 септември. Дотогаш, всушност, треба да се доработатот постаментите.

„На постаментите деновиве ќе ги фиксирам релјефите во бронза, на кои ќе има мотиви од ајдутството и од комитскиот период претставени преку ликовите на Сирма Војвода, дедо Иљо Малешевски, Димитар Поп Георгиев Беровски, Питу Гули, Васил Чакаларов, Панде Кљашев, Партеније Зографски, Глигор Прличев, а симболично ќе биде изгравирана и заклетвата на комитите претставена преку пиштол и нож“, информираше вчера возбудено Дуковски, презадоволен од тоа како неговото дело се вклопило во амбиентот.

Појасни дека симболичната нишка на лавот и мотивите е знамето со лав што го носеле ајдутите и комитите при секоја битка. Авторот е убеден дека убавината на лавовите и целосниот амбиент, воопшто, ќе биде уште повпечатлив кога ќе се обнови и оградата на „Гоце Делчев“, за која моментално се работи изведбен проект.

Инаку, општинарите од Центар и вчера уверуваа дека нема простор за сомнеж за статиката на мостот по конечното поставување на сите четири лава, а кое се очекува веќе денеска.

„Скулптурите се поставуваат надвор од конструкцијата на мостот, така што нема да има дополнителни оптоварувања и можност за нарушување на статиката на објектот, иако веќе извесен период постојат такви шпекулации“, изјави вчера Јовица Ацковски, портпарол во Општина Центар.

Тој најави дека денеска или утре се очекува да се постават и останатите два лава, дело на Константин Јанев. Уверувањата од општината за безбедноста на мостот неколкупати досега ги коментираа и стручните лица, кои потенцираа дека токму предвидената локација на скулптурите нема да претставува проблем за статиката. Таа би била доведена во прашање само во случај да била избрана друга локација, како, на пример, крилата на мостот, самиот мост или, пак, средишниот распон на објектот, што, сепак, не е случај со фактичката состојба.

Двата лава што се поставија вчера, според авторите Дуковски, се реални, додека другите два ќе бидат стилизирани. Леењето на сите четири скулптури ги чинеше општинарите речиси 2,5 милиони евра.