Унгарецот Тамаш Тот победник на Скопскиот маратон

Во женска конкуренција најуспешна беше Кенијката со босански пасош Лусијани Кимани

Миодраг Мицковиќ

Унгарскиот атлетичар Тамаш Тот победи на четвртиот по ред традиционален скопски маратон на кој во трите трки учествуваа околу 2.400 тркачи. Тот постигна време од 2:28,56, втор на целта во трката на 42.195 км пристигна Холанѓанецот Нил Стрикт со време 2:31,11 а трет беше Виорел Гиргита од Молдавија чие време изнесуваше 2:32,22.

Од македонските маратонци најуспешен беше Александар Андонов кој го освои петтото место додека веднаш на целта по него пристигна струмичанецот Ѓорѓи Трендафилов.

Како што се очекуваше, во женска конкуренција на главниот маратон победи Кенијката Лусијани Кимани, која настапи со босански пасош со време 2:55,56. Втора е минатогодишната победничка Хрватката Марија Врајиќ со 2:59,27 а трета Кетилин Фаркаш од Унгарија.

На полумаратонскатга трка во должина од 21 км најуспешен беше Србинот Саша Столиќ кој постигна време од 1:14,02, втор е Атила Филев (Србија) со 1:19,42, а трет е Кокан Ајановски од Македонија 1:21,50.

Црногорката Слободанка Перуновиќ е победник на полумаратонската трка со време од 1:25,34, втора е Ксенија Подолвик (Србија) со 1:26,26, а трета Македонката Ениса Тасевска со 1:36,34.

На хуманитарната трка на 5.000 метри победи Стојан Поповски пред Јовица Ристевски и Никола Кутановски, сите тројца од Македонија.

Наградниот фонд изнесуваше 10.000 евра. Победниците на главниот маратон во машка и женска конкуренција добија по 1.700 евра.

Да одбележиме дека целиот приход од котизацијата за учество и донатори на трката на 5.000 метри беше наменета за Клиниката за белодробни болести за деца во Козле.

Покровител на маратонот беше град Скопје, делегацијата на Европската унија во Македонија и Агенцијата за млади и спорт, успешни организатори Сојузот на спортови на Скопје, Атлетската федерација на Македонија и Атлетскиот клуб Работнички. За организаторите сите честитки бидејќи маратонот мина во најдобар ред.

Да одбележиме дека покрај многуте познати личности од јавниот и спортскиот живот во трката на 5.000 метри се појавија и господинот Ерван Фуере, градоначалникот на Скопје Коце Трајановски, амбасадорката на Холандија на Македонија Симоне Филипине и други.