Ставрески и Протогер го мереа пулсот на СДСМ

Прашање на часови кога СДСМ и ВМРО-ДПМНЕ ќе „запукаат“ една кон друга

Соња Крамарска

Кога среде неколку стотици одбрани членови на СДСМ се појавија Зоран Ставрески - министер за финансии и кум на премиерот Никола Груевски и Мартин Протогер - десна рака на Груевски и генерален секретар на ВМРО-ДПМНЕ, и двајцата дел од партиско-владината клика собрана околу премиерот, првата мисла што паѓа на памет е - како тие се вклопија во зовриениот опозициски амбиент, во саботата вечерта во Универзална сала.

Сериозниот Зоран Ставрески, дотеран како за седница на Влада, и Мартин Протогер, облечен во малку полежерен стил, беа главната политичка атракција на промоцијата на програмата на опозициските социјалдемократи. Придружувани од владиниот протокол, тие беа меѓу првите гости што ги зазедоа своите места во една од ложите на Универзална сала, каде што останаа до последната минута од партискиот собир на ривалите.

Присуството на двоецот Ставрески-Протогер предизвика без малку сензација на конференцијата на СДСМ. Тоа е првпат во близу две децении плурализам во Македонија една партија да прати толку високи претставници на собир на ривалска партија. „Мислам дека намерата на Груевски беше да ги прати своите најдоверливи луѓе за да ја почувствуваат и да му ја пренесат атмосферата од промоцијата на партиската програма на СДСМ“, вели поранешниот премиер и лидер на социјалдемократите, Владо Бучковски.

Не е тајна дека поранешниот вицепремиер и сегашен министер за финансии Зоран Ставрески е архитектот на економската политика на Владата. Тој со внимание ги ислуша мерките што ги предлага СДСМ во својата програма, но веднаш по завршувањето на партиската конференција, рече дека тие веќе биле дел од економскиот систем на земјата, но не дале резултати.

Во еден момент од партискиот собир на социјалдемократите, на кој главниот збор го имаа лидерот Бранко Црвенковски и потпретседателите Зоран Јовановски, Зоран Заев и Гордан Георгиев, Црвенковски го прозва Ставрески за одбивањето да се појави на телевизиски дуел со Зоран Јовановски. „Зоки, дали се' уште важи поканата до Ставрески за дуел со тебе на една од телевизиите“, го праша Црвенковски својот потпретседател Зоран Јовановски на што доби потврден одговор, а очите на сите се свртеа кон Ставрески, кој скржаво се насмевнуваше.

Без разлика на мотивите, присуството на топ-политичари од десницата на собирот на ривалската левица претставува позитивен преседан во односите меѓу македонските партии. Илија Димоски, директор на Центарот на комуникации на ВМРО-ДПМНЕ, вели дека намерата на владејачката партија е да даде позитивен импулс во односите на двете партии, кои инаку важат за непријателски расположени една кон друга.

„Сметавме дека треба да покажеме почит кон нашата конкуренција и подготвеност да ја ислушаме нивната политичка понуда, особено и поради фактот што министерот Зоран Ставрески е еден од столбовите на економската политика на ВМРО-ДПМНЕ“, вели Димовски.

Веројатно е прашање на часови кога двете водечки партии во Македонија ќе „запукаат“ една кон друга. Впрочем, антирекламните флаери против програмата на СДСМ што осамнаа вчера како додатоци на некои дневни весници, иако официјално го немаат потписот на ВМРО-ДПМНЕ, сведочат дека непријателствата не се прекинати.

Политичкото неискуство и отсуството на самоконтрола кај Мартин Протогер беа причина на неговиот лик цели два часа да се менуваат изрази на бес, иронија и цинизам додека траеше претставувањето на програмата на социјалдемократите. За разлика од Протогер, на ликот на Ставрески не можеше да се прочита речиси ништо. Неговата маска на иста рамнодушност со која дава одговори на новинарите или соопштува владини мерки и овој пат беше пречка да се прочитаат емоциите кон настапите на ривалите. (С.К.)