На велосипед низ Скопје за 10 денари на час

„Градски паркинг“ ќе рента велосипеди на четири пункта, кај „Телеком“, „Бисер“, Ѓорче Петров и „Треска“

Сања Наумовска


Скопјани од идниот месец ќе можат да изнајмат велосипед за 10 денари за еден час. Ќе ги рента јавното претпријатие „Градски паркинг“, кое ќе ги чува на своите паркиралишта. На располагање на љубителите на алтернативните начини на превоз засега им се 100 велосипеди, кои се холандска донација за Градот Скопје, преку проект на невладина организација.

Бројката, како што најавуваат од јавното претпријатие, во иднина ќе се зголемува. Велосипедите ќе бидат лоцирани на четири пункта низ градот, во центарот кај „Телеком“, кај „Бисер“ во Аеродром, во Ѓорче Петров и кај „Треска“. За неколку месеци, велат во „Градски паркинг“, може да се очекува на секој нивни паркинг да има одреден број велосипеди. Ќе се нудат и на училишта, факултети и други институции. Редовните корисници можат да добијат и попусти, а ќе се формира и клуб на велосипедисти.

„По завршувањето на проектот на невладината организација преку која се донирани велосипедите, Градот изнајде начин тие и понатаму да им бидат на располагање на граѓаните. ’Градски паркинг’ има мрежа на паркиралишта каде што можат да се чуваат, а поседува и софтвер со кој ќе се врши наплатата на услугата“, вели директорот на јавното претпријатие, Панче Стојановски.

Велосипедите ќе може да се најмат на еден паркинг, а да се вратат на друг. Пред најмувањето ќе се оставаат податоци на пунктот, а ќе се плаќа при враќањето. Може да се користат пари, картички или, пак, како кај зонското паркирање, СМС-порака.

Секој велосипед ќе има свој идентификациски број и ќе биде осигуран од уништување. Овој начин на рентање, сметаат во „Градски паркинг“, ќе биде привлечен за граѓаните кои ќе добијат евтин и пристапен, а наедно и здрав начин на превоз. Во иднина, вели Стојановски, ќе има и специјални бонуси за сите кои автомобилот ќе го остават на паркинг на периферијата на градот, на пример во Ѓорче Петров и оттаму ќе изнајмат велосипед до центарот.

„Новата дејност со која ќе се занимава нашето претпријатие нема да ни донесе профит, но и покрај тоа, имаме големи планови како да го развиваме. Сепак, нашата крајна цел е помалку возила во центарот на градот, која ќе се постигне со подигнување на свеста кај граѓаните дека овој начин на превоз е еколошки, а и евтин“, вели Стојановски.