Македонија невидлива во Унијата

Од Европската комисија не објаснуваат зошто медијаторот Метју Нимиц го откажа престојот во Брисел

Слободанка Јовановска

Додека македонските функционери го поттикнуваат националниот идентитет дома, Македонија во Брисел се' повеќе исчезнува од актуелната агенда и, ако продолжи овој тренд, нашиот датум за преговори за членство лесно ќе се симне од календарот на Европската унија.

И покрај посетата на шпанскиот министер Мигуел Анхел Моратинос идниот понеделник Македонија не е тема на ниту еден состанок на повеќето нивоа во Унијата, а функционери од Советот, и покрај упорното пребарување на календарот, не можеа да најдат таква најава и за блиска иднина.

Од канцеларијата на Моратинос ни изјавија дека се' уште немаат специфична порака за нашата Влада, освен генералната дека Балканот им е приоритет, а турнејата на министерот е дел од напорите да се забрза нашата евроинтеграција. Што конкретно, дали ќе има нова иницијатива околу спорот за името и дали ќе се бара излез од политичката блокада околу датумот - се прашања за кои се' помалку размислуваат во Брисел.

„Времето минува, а ништо не се случува. Никој не го отвора прашањето за Македонија на состаноците, никој не зборува на оваа тема и таа веќе не е големо прашање. Тоа станува ваш најголем проблем“, порачува дипломат од Брисел што е упатен во случувањата околу нашата држава.
Според негова оцена, Македонија е се' повеќе заборавена во Унијата и главна задача на нашите власти сега е да се привлече повеќе внимание околу нашето прашање. „Си го губите времето, а ваш интерес е работите да тргнат напред. Грција нема потреба од решение на спорот“, вели дипломатот, додавајќи дека нереално е да се мисли оти Брисел може да го врати процесот назад т.е. да ја повлече препораката за почнување преговори, иако нејзиното спроведување станува проблем за Унијата. Кристина Галах, портпарол на шпанското претседателство во Брисел, оценува дека би била изненадена ако Моратинос има нешто конкретно да и' пренесе на Македонија околу датумот, но дека самото доаѓање во земјата покажува оти Мадрид е ангажиран. Сепак, таа нагласи дека Мадрид не е единствен што решава за ставот на Брисел кон Македонија и дека спинувањата за некакви условени преговори не може да се потврдат, бидејќи околу такви одлуки решаваат сите земји.

Искуството досега покажа дека никакви условени одлуки, датуми или преговори не поминуваат во Брисел и оти тие се само дел од листата нереални обиди да се деблокира евроинтеграцијата на Македонија, бидејќи Грција јасно покажа оти тоа не го прифаќа. Очигледно е дека последниве месеци потонуваат сите иницијативи да се даде динамика на преговорите меѓу Македонија и Грција, без оглед на средбите на Никола Груевски и Јоргос Папандреу, единствен опиплив резултат се меѓусебните препукувања и блокадата на процесот.

Од Европската комисија, исто така, не објаснув��ат зошто медијаторот Метју Нимиц го откажа престојот во Брисел, со порака оти се надеваат дека тоа е затоа што е презафатен пишувајќи нов предлог за решение на спорот. Алузијата е дека без конкретна идеја медијаторот нема што да бара во Унијата, а според објаснувањата во Брисел, прогрес не е можен без активен придонес на Македонија и на Грција.

Нимиц требаше да им се обрати на европарламентарците во Комисијата за надворешна политика во ЕП, но фактот дека тој не може да каже детали за преговорите, бидејќи се зад затворена врата, бил искористен од оние што сакале да ја спречат неговата посета.

Од друга страна, пак, шефот на македонската дипломатија Антонио Милошоски вчера потврди дека ниту следната преговарачка рунда не е сосема извесна, па откако двапати ја најавуваше безуспешно, станува јасно дека тој и нашата Влада не владеат со ситуацијата околу преговорите.

Тоа е слатка одмазда на Атина за кавгаџиските пораки од Македонија наспроти јавните заложби за преговори, па прашањето за нас сега е дали во тие тактизирања нашата Влада е сосема невина или, што би рекол Димитрис Друцас, „провоцира за да нема преговори“. (С.Ј.)