Притвор за крадците што беа ранети во Велес

Едномесечен притвор им е одреден на двајцата разбојници што пред некој ден беа ранети по кражбата што ја извршија во продавница за техничка стока во Велес. Против скопјаните Алмедин Хаџибулиќ (26) и Јасмин Куч (22) полицијата поднесе кривична пријава за посебни случаи на фалсификување исправи, односно за тешка кражба. Третиот нивни партнер е во бегство и по него се трага.

Според МВР, тројцата осомничени во почетокот на 2011 година украле скопска регистерска табличка од „југо“ и ја ставиле на „ауди 80“, со кое во понеделникот ја извршиле кражбата во продавницата за техничка стока „Мастер нет електроникс“ во Велес. Оттаму украле осум лаптоп-компјутери и два ЛЦД-телевизора и ги ставиле во „аудито“.

„Во моментот кога ја вршеле тешката кражба, биле забележани од полициски службеник, кој во два наврата гласно ги предупредил со зборовите ‘стој полиција‘“, велат од полицијата.

Но, откако тие продолжиле со кражбата, полицаецот испукал во воздух неколку куршуми од својот службен пиштол.

„Пријавените, не почитувајќи ја наредбата, влегле во возилото, вперувајќи огнено оружје кон него, по што од страна на полицискиот службеник б��ле испукани неколку куршуми кон возилото со цел да се онеспособи и сторителите да бидат фатени“, соопштуваат од МВР.

Крадците, сепак, успеале да заминат со возилото во правец кон Скопје, по што Хаџибулиќ и Куч побарале лекарска помош во Градската болница, а третиот партнер го однел возилото кај каменоломот во близина на Катланово и го запалил. Во близина полицијата пронајде еден лаптоп за кој се верува дека е украден од велешката продавница. (Х.Р.)