Ново архитектонско „чудо“ во центарот

Катна гаража во барокен стил од 30 метри ќе никне меѓу „Пошта“ и МЕПСО, а ќе чини 8 млн. евра

Деспина Трајковска



Деветкатница во барок што не е барок, распослана на 10.000 квадрати, изградена од бетонски столбови и стакло, со капацитет за паркирање од најмалку 315 возила и тешка дури 8 милиони евра. Ваква ќе биде катната гаража што ќе ја гради идната година Јавното претпријатието за стопанисување со станбен и деловен простор на постојното зеленило помеѓу МЕПСО и „Македонска пошта“ во центарот на Скопје.

Ова, дефинитивно, ќе биде уникатен објект за паркирање во Европа поради фасадата наложена со проектот „Скопје 2014“. Иако старински и естетски испомешан надворешен изглед, објектот внатре ќе биде современ. Паркирањето во него ќе се изведува со лифтови, а освен за основната намена, во објектот ќе има и деловен простор. Предвидени се три бутици, Интернет-кафе, кафе-бар, простор за други угостителски дејности... За комерцијалните содржини ќе бидат „резервирани“ приземјето и првите два ката, а за паркирање вкупно десет, две подземни нивоа и останатите катови.

Владимир Бахчовановски, директор на ЈПССДП, вели оти е рано да се зборува за конечната вредност на објектот, но првичните процени се дека неговата изградба ќе чини најмногу 8 милиони евра.

„Моментно се работи на идејниот проект за оваа гаража, чие идејно решение е дело на Офелија Томиќ, архитектка, избрано на јавен конкурс. Сега тече и изборот за идејните решенија на останатите три катни гаражи. Проценивме дека изградбата на сите четири објекти ќе не' чини околу 30 милиони евра, средства кои во најголем дел планираме да ги обезбедиме преку кредити“, вели Бахчовановски.

Според плановите на претпријатието, сите четири катни гаражи треба да почнат да се градат наредната година и, најверојатно, рокот за изведба ќе им биде 18 месеци. Освен гаражата кај „Пошта“, која ќе биде наводно со барокен стил, останатите три катни гаражи ќе имаат модерни стаклени фасади. И во нив ќе има најмалку по еден кат наменет за деловен простор. Едната од нив ќе се гради кај Работнички дом и таму ќе се пресели ЈПССДП, друга гаража ќе се гради кај „Телеком“ и една од левата страна на Вардар, до Музејот на холокаустот.

Паркирањето во сите објекти ќе се изведува со лифтови, што според надлежните остава простор за поголем капацитет за паркирање. Со овој принцип на паркирање ќе се заштитела и животната средина, бидејќи ќе има мало количество издувни гасови од возилата.

Најпростран, иако не и највисок, ќе биде објектот кај Работнички дом. Постојниот ДУП сега дозволува изградба на четирикатница, но од претпријатието размислуваат да побараат дозвола за дополнителни два ката. Катната гаража кај „Телеком“, пак, ќе има девет ката. По принципот паркирање со лифт во гаражата ќе се овозможи капацитет од 406 паркинг-места. Катната гаража на аголот кај Музејот на холокаустот, според ДУП, налага капацитет од минимум 200 места за паркирање, но тој ќе достигне до 320, бидејќи паркирањето ќе се врши со лифт.

Инаку, локациите на кои ЈПССДП ќе ги гради катните гаражи до неодамна беа државни и требаше да се продаваат на лицитација, но во меѓувреме Владата се премисли и одлучи шест парцели наменети за катни гаражи да ги распредели на станбеното претпријатие и на Градот Скопје. ЈПССДП очигледно изигра подобро, а градските власти, односно ЈП „Градски паркинг“, доби од државата само две гратис-локации за изградба на катни гаражи.