Бесен возач сакал да прегази полицајци во Штип

Полицаец е повреден во бркотницата со еден бесен возач низ штипските улици. Инцидентот се случил завчера, околу 9 часот, во близина на стоковната куќа во Штип. Тројца полицајци со службеното возило „фолксваген поло“ се обиделе да легитимираат возач на „мерцедес“ со бугарски таблички, кој не ги почитувал сообраќајните правила и прописи. Но, тогаш настанала вистинска бркотница. Полицајците го следеле возилото до трговскиот центар и застанале неколку метри зад него. Неочекувано, следениот возач преминал во напад. Го придвижил „мерцедесот“ наназад и удрил во полициското возило, а потоа се оддалечил од нив.

Полицајците несоземани од ударот, се соочиле со нов напад, односно триесегодишниот штипјанец Б.Х. повторно се вратил назад, го удрил службеното возило од задната страна и го туркал околу 50 метри. „Потоа го исфрлил на десната страна од тротоарот, при што оштетил и едно паркираното возило во сопственост на СИЗ за домување-Штип“, велат од полицијата.

Возачот повторно завртел еден круг околу трговскиот центар, по што се вратил и пак се упатил кон полицајците, кои брзо се качиле на тротоарот за да не бидат прегазени. „Возачот тогаш почнал со голема брзина да се движи назад, потоа застанал зад стоковната куќа, излегол од возилото и отишол во кафетерија од каде што е приведен“, информираат од МВР.

Од ударот еден од полицајците се здобил со повреда на левото колено и по укажаната лекарска помош е пуштен на домашно лекување. Извршен е увид, од возачот е земена крв и урина за проверка на присуство на алкохол и метаболити. По целосно расчистување на случајот против Б.Х. ќе биде поднесена кривична пријава за „спречување службено лице во вршење службено дејство и насилство“. (Х.Р.)