Се' уште се испитува јулскиот инцидент

Анкетната комисија за јулскиот инцидент веќе го проби рокот - 23 октомври (60 дена од формирањето на 23 јули ), во кој требаше да достави извештај до Собранието. Претседателот на Комисијата, Харјула Мисини, е оптимист дека работата ќе финишира до петок. Тој вчера најави дека ќе ја редуцира листата на лицата што треба да бидат анкетирани. Сепак, прилично дискутабилно е колку се реални неговите очекувања со оглед на тоа што се' уште не сведочеле: директните учесници во инцидентот, двајцата потпретседатели на Собранието, Јани Макрадули и Светлана Јакимовска, како и спикерот Трајко Вељаноски.

Инаку, вчера пред членовите на Анкетната комисија даваше исказ потпретседателот на Собранието, Рафиз Алити, кој делумно претседаваше за време на пленарната седница на 1 јули кога се случи инцидентот. Алити рече дека забележал нервоза меѓу пратениците, особено кај координаторите на пратеничките групи на СДСМ и на ВМРО-ДПМНЕ, посочувајќи дека имало злоупотреби на процедуралните обраќања. Но, според него, „во Собранието немало ништо друго невообичаено“.

„Тој ден низ Собранието се движев како и секогаш и не забележав дека се шетаат вооружени неуниформирани лица“, рече Алити. Притоа додаде дека ниту од собранискиот спикер ниту од генералниот секретар не бил известен дека „во парламентот има лица без беџови и дека е побарано дополнително обезбедување“. (О.В.)