Претходен број

Д-р Сашко Кедев го освои Монт Еверест

Тоа е трет алпинист од Македонија кој се искачи на највисокиот врв на светот висок 8.848 метри

Миодраг Мицковиќ

Познатиот кардиолог и голем љубител на планините и височините, д-р Сашко Кедев, е трет алпинист од Македонија кој успеа да го освои највисокиот врв на светот Монт Еверест висок 8.848 метри. Д-р Сашко Кедев, заедно со шерпасот Анг Дорџи, се искачи на највисокиот врв на светот вчера, 19 мај, во 8 часот. Пред нив на врвот се искачи шерпасот Пасанг Тензинг во 7,30 часот, малку подоцна на Монт Еверест, покрај македонското, се развиорија и знамињата на Австралија и на Англија, бидејќи на покривот на светот успеаја да се искачат и Австралиецот Нил Јохансон и Англичанецот Хамиш Фултон. На шерпасот Анг Дорџе, кој заедно со д-р Сашко Кедев стапна на највисокиот врв на светот, тоа му беше 13. успешно искачување на Монт Еверест.

Монт Еверест го освоија уште двајца Македонци - битолчанецот Димитар Илиевски-Мурато пред 20 години, на 10 мај 1989 година, но тој трагично го загуби животот по враќањето од врвот кон базниот логор, и д-р Глигор Делев, кој се искачи на покривот на светот на 20 мај 2007 година.

Д-р Сашко Кедев и неговите придружници го освоија Монт Еверест од јужната, потешката страна. Заедно со нив и двајцата шерпаси, вчера Монт Еверест го освоија уште четворица шерпаси.

Според известувањето испратено на веб-страницата mounteverest.net, времето било облачно од страната на Тибет, а поведро од јужната страна, кон Непал.

За многумина можеби ќе биде изненадување освојувањето на Монт Еверест од страна на д-р Сашко Кедев, но оние кои добро го познаваат, беа уверени во неговата намера дека тој ќе успее да стапне на покривот на светот. Кедев, како што дознаваме, престојуваше на Хималаите повеќе од 40 дена обидувајќи се да го освои Монт Еверест. Во Непал допатува со група алпинисти од САД, не беше тоа класична експедиција, повеќе група ентузијасти, но искусни алпинисти, кои исто како и Кедев ја имаа желбата да се искачат на највисокиот врв на светот. Д-р Сашко Кедев беше ангажиран од нивна страна да биде лекар во екипата, но над базниот логор, значи на височини поголеми од 5.350 метри.

Имаме информации дека шестмина членови на екипата со која беше д-р Кедев се откажале од намерата да се искачат на Монт Еверест поради проблеми со висинската болест, успеале да дојдат до височина од 7.300 метри, но потоа се вратиле во логорот исцрпени, откажувајќи се од искачувањето до самиот врв. На таа височина од околу 7.000 метри една недела престојувале и Кедев и уште тројца алпинисти од групата кои заедно со него допатувале на Хималаите, но поради мошне лошото време, силни виулици и силен ветер, биле принудени и тие да се вратат во базниот логор. Но, штом времето се подобрило, повторно тргнале кон врвот. Последниот камп бил поставен на височина од 8.100 метри за да го искористат поволното време без ветер и виулици, но со многу снег и да тргнат кон врвот. Ова се последните денови кога може да се освои Монт Еверест, бидејќи потоа е невозможно со оглед на лошите временски услови.

Немаме информации колку време му било потребно на д-р Кедев да се искачи на Монт Еверест од последниот логор. Не се задржал многу на врвот и заедно со алпинистите од Австралија и од Англија и шерпасите успеал безбедно да се симне во кампот број 4 на височина од околу 6.000 метри, сите пресреќни што успеале да го освојат Монт Еверест за кој толку многу сонувале.

Д-р Сашко Кедев може да се пофали со искачување на повеќе највисоки врвови на сите континенти на светот. Под неговите нозе останаа Аконкагва, највисок врв во Јужна Америка (6.962 м), потоа Мекинли на Алјаска, највисок врв на Северна Америка (6.194 м), кој е мошне тежок за искачување поради ниските температури и силните ветришта, потоа на највисокиот врв на Африка - Килиманџаро. Кедев е меѓу освојувачите и на еден од најтешките алпинистички врвови за искачување - Матерхорн на Алпите. И на крајот, тој го гледаше светот од највисокиот врв Монт Еверест висок 8.848 метри.