Претходен број

Македонија не го заборава наследството на Трајковски

Трагично загинатиот претседател остави систем на вредности за кои вреди да се залагаме

Жаклина Хаџи-Зафирова

„Борис е светла страница во најновата македонска историја, олицетворение на еден систем на вредности, за кој вреди да се залагаме. Борис е нашиот претседател, кој успехот на Македонија го натопи со својот живот. Токму затоа, но и поради многу други нешта, тој останува личност, чие наследство и во иднина ќе ја определува смислата на македонската политика. Македонија ќе покаже дека знае да ги цени позитивните вредности и ќе продолжи да чекори по патот на демократијата и меѓусебното почитување, како што тоа го правеше Борис Трајковски“, истакна претседателот на Собранието, Трајко Велјановски, на вчерашната свечена собраниска седница со која се одбележа петгодишнината од загинувањето на претседателот Трајковски во авионска несреќа, во која животот го загубија и осуммина негови соработници и членовите на екипажот.

По тој повод, вчера во Македонија се одржаа повеќе манифестации со кои државава му оддаде почит на трагично загинатиот претседател. Покрај свечената седница, во Собранието се одржа и меѓународна конференција во чест на Трајковски, а беше отворена и библиотека која ќе го носи неговото име. Прексиноќа во Македонската опера и балет се одржа академија во чест на загинатиот претседател на која се обрати претседателот на МАНУ, а беше промовиран и документарниот филм „Претседателот“ од авторите Снежана Клинчарова и Горан Тренчовски. На вечното почивалиште на Трајковски на градските гробишта во Бутел државна делегација вчера положи цвеќе.

Во обраќањето пред присутните во собранискат�� сала, меѓу кои беа и членовите на семејството на починатиот Трајковски, првиот парламентарец Трајко Велјановски истакна: „Овој голем човек застана на кормилото на македонскиот брод во период исполнет со бури и невремиња, во кои требаше мудрост, храброст за мирно да се одведе во мирните води на меѓуетничкото разбирање и толеранцијата, силно нарушени во воениот конфликт од 2001 година“, рече Велјановски, нагласувајќи дека имплементацијата на Охридскиот рамковен договор се одвива добро, а тоа е процес што ќе треба да се надградува. Претставувајќи го Трајковски како иницијатор на идејата за формирањето на Јадранската група заради побрзо вклучување во НАТО, првиот парламентарец констатираше дека оваа визија на Трајковски не се остварила, но остануваат заложбите за влез во Алијансата и ЕУ.

„Борис Трајковски посебно внимание посветуваше на иднината на регионот, но и на светот. Токму затоа во меѓународната заедница важеше за лидер во Југоисточна Европа“, потенцира Велјановски, додавајќи дека наследството кое ни го остави Трајковски е големо. Велјановски му порача на семејството на Трајковски дека најмалку што може Македонија да стори за претседателот Трајковски е да го негува и надградува неговото наследство. Сепак, тој не заборави да ги спомне и изборите во својот говор, за кои се надева дека ќе поминат во фер и демократска атмосфера.

Претпладнето, свежо цвеќе на вечното почивалиште на Трајковски положија членови на неговото семејство, како и претседателот Бранко Црвенковски и премиерот Никола Груевски, кој, на изненадување на присутните, доцнеше дваесет минути. На гробот на Трајковски дојде и собраниска делегација, предводена од претседателот Велјаноски, како и претставници на АРМ и од дипломатскиот кор. Цвеќе за Трајковски беше положено и на спомен- обележјето на местото на несреќата во близина на Мостар, каде што замина државна делегација предводена од потпретседателот на Собранието, Рафиз Алити, заедно со министерот за надворешни работи, Антонио Милошоски и претставници од претседателскиот кабинет.

Пратениците вчера со емоции се присетија на прерано загинатиот претседател. Нивна заедничка оцена беше дека на Македонија и' е потребен претседател како Трајковски.

„Со смртта на Трајковски загубивме многу. Беше ослободен од суета и знаеше важните државни прашања да ги гледа како прашања на луѓето, без мистериозност. Нам ни треба таков претседател, но дали ќе најдеме - не знам“, изјави пратеникот Стојан Андов. Тој оцени дека односот спрема Трајковски бил многу контроверзен, а самиот тој бил многу напаѓан. Околу новите моменти за истрагата за несреќата, Андов потенцира дека нашите органи се должни многу повеќе да бидат заинтересирани за вистината за да нема нелогичности.

Илија Димовски од ВМРО-ДПМНЕ рече дека Трајковски во колективната меморија ќе остане запаметен како најдобар претседател што го имала Македонија. „Трајковски во меморијата на сите ќе остане запаметен како политичар со голем визионерски капацитет, со голем дух и со разум и разбирање за сите околу себе“, коментираше Димовски. Прашан за кандидатот Иванов, тој одговори дека секој човек има свои карактеристики, а сите кандидати кои ги предлагаат тие ги исполнуваат основните морални и човечки кодекси за таа функција. Во врска со истрагата за „кингерот“, тој потсети дека пратениците на ВМРО-ДПМНЕ пред извесно време иницирале формирање анкетна комисија која очекува да продолжи со работа по изборите. Иако, според него, МНР паралелно води постапка. Пратеникот на СДСМ, Јани Макрадули, рече дека ќе го памети Трајковски како пример на кој начин треба да се водат работите, односно секогаш да се консултира опозицијата како што тоа го правеше Трајковски. „Сите претседатели оставиле свој печат и покажале многу поголема храброст отколку владите, биле порешителни и работеле во интерес на граѓаните“, оцени тој. Макрадули оцени дека е симптоматично што истрагата за „кингерот“ се актуализира секогаш за годишнините од смртта на Трајковски.

Во чест на Трајковски вчера попладнето се одржа меѓународен лидерски форум на тема „Нашите заеднички вредности“. Вицепремиерот Абдулаким Адеми на форумот истакна дека иднината на Македонија ќе зависи од хероите на ова време. Тој порача дека на овие простори им се потребни лидери кои ќе го покажат патот кон евроатланските структури. За синоќа беше предвидено да се одржи Вечера на молитва и заедништво.

Струмица одбележа пет години од смртта на Трајковски

СТРУМИЦА - Членови на семејството, граѓани, претставници на Општината и на политички партии вчера ја одбележаа петгодишнината од трагичната смрт на претседателот Борис Трајковски. На неговиот споменик во Струмица беше положено цвеќе, а реч за ликот и делото на Борис Трајковски одржа градоначалникот Зоран Заев.

„Наш врвен интерес, а тоа беше врвен интерес и на Борис Трајковски, е да станеме дел од демократскиот свет, користејќи ги сите предности што ги носи членството во евроатлантските интеграции“, нагласи Зоран Заев.

Мојсеј, братот на Борис Трајковски, ја поздрави одлуката на Министерството за внатрешни работи за повторно отворање на истрагата за смртта на претседателот. „Можеби некои зборуваат дека е доцна за истрага, но не е. Има многу моменти кои укажуваат на нешто друго. Но, не сакам да зборувам повеќе од овластените луѓе за тоа прашање“, изјави Мојсеј Трајковски.

Чествувањата по повод петгодишнината од смртта на Трајковски во неговата родна Струмица продолжија синоќа со одржување на традиционалниот ораторски натпревар на средношколците на Македонија на тема „Претседателот“. За најдобрите млади оратори се предвидени парични награди. (Е.П.)