Претходен број

За чешкиот премиер изборите се матурски испит за Македонија

Македонија ги исполни сите услови за симнување на визниот режим, рече Тополанек

Тамара Грнчароска


Со порака дека Македонија ќе мора да го положи матурскиот испит, а тоа се изборите во март, чешкиот премиер и претседавачот со Советот на Европската унија, Мирек Тополанек, вчера во Скопје изрази очекување дека изборите ќе бидат добри и оти инцидентите ќе останат исклучок од минатото.

Тополанек, исто така, изрази надеж дека Македонија ќе ги исполни осумте препораки од Европската комисија, како услов за добивање датум за старт на преговорите за членство, „по што ќе остане само несреќниот спор за името“.

Во контекст на спорот со Грција, тој изјави дека „ако некое претседателство на ЕУ каже како може да се реши тоа прашање - лаже“. „Тоа е билатерален спор, и како во спорот со Хрватска и Словенија Европската унија може да биде медијатор, но тоа ќе остане билатерален спор“, рече Тополанек. Според него, Грција е членка и тешко е да се замисли дека некоја земја би зазела страна, лоцирајќи го проблемот во спорот околу името на нашата земја со Грција како длабок ментален, историски и психолошки проблем. Потенцирајќи дека спорот се одвива под медијаторство на ОН, чешкиот премиер изрази надеж дека тој ќе се реши до крајот на годината. „Ви држиме среќа да најдете решение, но не може да ви помогнеме“, рече Тополанек.

За очекувањата на нашата земја за визната либерализација тој изјави дека Македонија ги исполнила сите услови за симнување на визниот режим, „но ако има проблем, тој би бил политички“. Тополанек укажа дека ќе се обиде заедно со Шведска, како идна земја-претседавач со ЕУ, терминот за укинување на визниот режим кон Македонија да биде 1 јануари идната година.

Говорејќи за актуелното претседавање на Чешка со ЕУ, Тополанек рече дека тоа е едно од најкомплицираните претседавања во последно време, и не само поради кризата со гасот, Газа и финансиската криза туку и поради амбициозните цели кои чешкото претседателство си ги има поставено. „Наш приоритет е Западен Балкан да се вклучи во ЕУ“, изјави Тополанек, кој рече дека неговата земја чувствува голема одговорност за оние земји кои останаа надвор од Унијата. „Оцените на Европската комисија во 2004 година беа многу позитивни и беше кажано дека и старите и новите земји добија многу од проширувањето“, рече Тополанек, со надеж дека тоа така треба да остане. За грчкото вето за Македонија во Букурешт тој изрази големо жалење, велејќи дека „од таму јас заминав нерасположен“. Со пофалба до македонските војници и за нивното учество во мисиите на НАТО, чешкиот премиер потенцираше дека подготвеноста на Македонија за влез во НАТО „е без никаква дискусија и ќе пробаме да го решиме проблемот за зачленувањето“.

Македонскиот премиер Никола Груевски за посетата на Тополанек рече дека доаѓа во значаен момент, во предвечерјето на изборите и оти со Тополанек имале содржајни и корисни разговори. Претседавачот со ЕУ на македонскиот премиер му ги пренел очекувањата во земјава да се одржат фер и демократски избори и таа да продолжи со својот пат кон ЕУ и НАТО. Груевски рече дека го информирал Тополанек за нашите заложби за членство во двете организации, исто така, и дека за нас е важна и либерализацијата на визниот режим. Притоа, Груевски ги потенцираше позитивните извештаи на трите оценски мисии на ЕК за визната либерализација, како и тоа дека нашата земја очекува поддршка од Чешка и другите земји до крајот на 2009 година да се укине визниот режим.

Груевски на прашањето за спорот околу името со Грција изјави дека „се надеваме да најдеме решение“. Како што рече тој, по јунските избори кај нашиот јужен сосед ќе се интензивираат разговорите и ќе се најде решение кое нема да ги загрозува националниот идентитет и интересите на Македонија.

Тополанек, одговарајќи на новинарско прашање за Лисабонскиот договор и неговата ратификација, рече дека Чешка, како и сите други земји, имаат свои сопствени уставни процедури и дека ќе се држи до тоа при ратификацијата.

Чешкиот премиер и актуелен претседавач со ЕУ вчера се сретна и со претседателот Бранко Црвенковски, претседателот на Собранието, Трајко Велјановски, се обрати и пред Националниот совет за евроинтеграции, а имаше средба и со претседателите на собраниските комисии за европски прашања и за надворешна политика.

Црвенковски, како што соопшти неговиот кабинет, се заблагодарил што Чешка Република и во минатото и сега на Македонија и' дава значајна поддршка за нејзините евроатлантски интеграции. Тој истакнал дека ЕУ е единствената алтернатива за Македонија и во исто време тоа е алтернатива и за Унијата. Тополанек се заблагодарил за приемот, нагласувајќи дека е во посета на Македонија во својство на премиер, кој настојува да ги унапреди билатералните односи, но и како претседавач, чија обврска е да придонесува за подобрување на глобалните процеси во ЕУ. Чешка Република, потенцирал Тополанек, и понатаму останува силен поддржувач на проширувањето на Унијата со земјите од Западен Балкан, вклучително и со Република Македонија.

Велјановски, како што соопшти неговиот кабинет, ги истакнал добрите билатерални односи помеѓу двете држави и меѓу двата парламента и укажал дека македонското Собрание многу сериозно работи на хармонизација со европското законодавство и остварување на реформите.