Стразбур води дијалог со Софија за македонското малцинство

Од нашиот дописник Тони Гламчевски

Стразбур - Во годишниот извештај на комесарот за човекови права на Советот на Европа имаше само еден мал дел посветен на положбата на македонското малцинство во Бугарија и неговите проблеми за регистрирање политичка партија. По претставувањето на својот извештај пред Парламентарното собрание на Советот на Европа, Томас Хамарберг најави дека ќе го продолжи дијалогот со грчките и бугарските власти во однос почитувањето на правата на македонското малцинство во овие земји и посебно околу спроведувањето на пресудите на Европскиот суд за човекови права што се однесуваат на правото за слободно здружување.

Македонските парламентарци Александар Николовски и Андреј Жерновски се интересираа за начинот на спроведувањето на пресудите на Европскиот суд за човекови права, во однос на правото на слободно здружување на припадниците на националните малцинства.

Во одговорот, Хамарберг рече дека сите одлуки на Европскиот суд за човекови права треба да бидат почитувани, за што е предвидена специјална процедура во дирекцијата за човекови права со редовна контрола од Комитетот на министрите. Комесарот за човекови права потсети дека една од процедурите е затворена, мислејќи на предметот ОМО „Илинден“-ПИРИН, нагласувајќи дека моментно се водат други процедури и дека уште неколку предмети се наоѓаат пред Судот во Стразбур. „Започнавме дијалог со бугарските власти во однос на ова прашање, но моментално не можам да кажам ништо повеќе“.

Андреј Жерновски побара од Томас Хамарберг да објасни како се спроведуваат неговите препораки за систематски дијалог со малцинствата и посебно за дијалогот на властите од Бугарија и во Грција со македонското малцинство во овие земји. Односно, дали постојат механизми за да се спроведи ова на дело, бидејќи засега, според Жерновски, не е направено ништо.

���Механизмот, всушност, е самиот дијалог. Одиме во земјите, дискутираме со нив, составуваме извештај и потоа се надеваме дека ќе доведе тоа до други дискусии. Но, нема специјални процедури за спроведување на препораките. Единствената процедура со која располагаме е самиот Суд. Затоа се повикувам на неговите одлуки и ќе го продолжам дијалогот со владите“, рече комесарот за човекови права.

Според Томас Хамарберг, дијалогот продолжува со Грција и Бугарија исто како и со другите земји. Изразувајќи надеж дека тоа ќе дозволи да се постигне напредок за да се заштитат целосно човековите права во овие земји. Коментирајќи ги заклучоците од неговиот годишен извештај за 2009 година, тој нагласи дека некои од нив ќе предизвикуваат противречности и дека иритираат. Но, во областа на човековите права не се работи чесно, ако не се каже вистината.

Интересно е дека Хамарберг при неговата интервенција избегнуваше да го употребува зборот „македонски“ иако прашањата му беа поставени директно. Сепак, тој во своите извештаи го употребува терминот Македонци и македонско малцинство кога зборува за Македонците и за македонското малцинство во Грција и во Бугарија и се залага за правото на самоидентификување на припадниците на овие малцинства кои официјално не се признати во своите земји.