Жерновски и Села повторно победници

Вчерашното прегласување измина во напрегната атмосфера и обвинувања за нерегуларности

ГОРДАНА ДУВЊАК

Без инциденти, но со многу обвинувања за изборни манипулации, особено во скопската општина Центар, помина вчерашното гласање во четири општини. По усвојувањето на преговорите од страна на Управниот суд, се прегласуваше вториот изборен круг на 29 гласачки места во Центар, едно место во Ѓорче Петров, 9 во Струга, додека вториот изборен круг за прв пат се одвиваше во сите 39 гласачки места во Долнени.

Резултатот од прегласувањето во скопската општина Центар повторно е во полза на опозицискиот кандидат Андреј Жерновски. Вкупниот број на гласови што ги освои тој во местата на прегласувањето изнесуваше 14.566 а кандидатот на ВМРО-ДПМНЕ актуелниот градоначалник Владимир Тодоровиќ 11.760. Во овој збир недостасуваат гласовите од избирачкото место на Водно, но од опозицискиот штаб триумфално јавија дека Жерновски победил со 3038 гласови разлика.

Демократската партија на Албанците во Струга прогласи победа на нивниот кандидат за градоначалник Зијадин Села. „На овие локални избори за кандидатот Зијадин Села гласаа 20.728 граѓани, а за Кочоски 14.676 или разликата е 6.072 гласови , изјави портпаролот Албрим Хоџа.

Во Долнени ДУИ призна пораз од кандидатот на ВМРО-ДПМНЕ кој добил 300 гласови повеќе. Меѓутоа веднаш најавија голем број на приговори за нерегуларно гласање во селото Црнилишта.

Како што соопшти Државната изборна комисија на прес-конференцијата одржана во 18 часот, одѕивот на гласањето во четирите општини изнесуваше 53,73 отсто. До 16 часот, на гласање излегле 22.921 граѓанин од вкупно 42.663 колку што според избирачкиот список имаат право на глас.

Според портпаролката на ДИК, Билјана Јовановска најголем одзив е регистриран во Долнени -63,50 отсто. На вкупно 39 избирачки места во општината на гласање излегле 6.680 граѓани. Во мултиетничката општина Долнени, во трката за градоначалник беа Боше Милошески од ВМРО - ДПМНЕ и Абдула Бајрамоски кандидат на ДУИ и досегашен градоначалник во оваа општина.

Во скопската општина Центар каде што се прегласуваше вториот круг од локалните избори на 29 избирачки места, одѕивот на гласањето изнесуваше 53,71 отсто, односно на гласање излегле 12.321 избирач од вкупно 22.939 запишани во избирачкиот список.

Во Струга, пак, каде што исто така се прегласуваше на девет избирачки места излезноста беше 43,40 отсто, односно на гласање излегле 3.422 граѓани. Се избираше меѓу Зијадин Сеља од ДПА и заедничкиот кандидат на ВМРО-ДПМНЕ и СДСМ, Владимир Кочовски.

Во Ѓорче Петров се прегласуваше на едно избирачко место во Волково и таму одѕивот е 37,73 отсто, односно гласале 498 граѓани. Се избира меѓу досегашниот градоначалник Сокол Митревски од коалицијата предводена од ВМРО-ДПМНЕ и Александар Наумовски од опозициската коалиција на чело со СДСМ, кој се откажа од натамошна трка по дознавањето на одлуката на Управниот суд да прифати само еден приговор. Тој обвини за политички притисоци врз Судот, бидејќи како што рече, не сака да биде дел од изборно сценарио и да послужи како алиби, затоа што не се прифатени истите забелешки во останатите приговори.

Од ДИК соопштија и дека гласањето се одвивало без прекини, а до нив не пристигнале официјални забелешки за нерегуларности

Жерновски му се заблагодари на Црвенковски

Возбуден од убедливата победа со повеќе од 3.000 гласа, Жерновски им се заблагодари на целосната поддршка која ја имал денеска од колегите пратеници од опозицискиот блок, но и од дипломатскиот кор, кои, како што рече, ја штителе демократијата на гласачките места. „Мојата победа е изборена по трет пат со тоа што во првиот круг противкандидат ни беше Владимир Тодоровиќ, во вториот круг Никола Груевски, а денеска противник на власта и беше народот. Оваа победа е јасен доказ дека волјата на народот насила никој не може да ја смени . Многу му благодарам на лидерот на СДСМ, Бранко Црвенковски, чии драгоцени совети доведоа до оваа наша заедничка победа“", рече изјави Жерновски.

Мост: Гласачи од други општини

Граѓанската асоцијација Мост, која го набљудуваше прегласувањето на локалните избори 2013 со 130 набљудувачи соопшти дека нивните претставници до 18 часот забележале реакции на партиски набљудувачи во општина Центар, за појава на гласачи за кои постои сомневање дека не живеат во општината, а поседуваат важечки биометриски документи и се запишани во Избирачкиот списо��.

Оваа појава, како што наведуваат, е забележана на дел од избирачките места во ОУ „Коле Неделковски“, ДСУ за рехабилитација и образование „Св. Наум Охридск“, ОУ „Јохан Хајнрих Песталоци“, Фудбалски Сојуз на Македонија на улицата „8-ма Ударна бригада“ како и Дом на градежници, каде, исто така посочуваат, е забележано зголемено присуство на полицијата, гужва и напната атмосфера во и пред избирачките места.

Во општина Долнени биле забележани случаи на семејно гласање, и тоа на избирачкото место 1472 - 12 случаи, на 1473 - 10 случаи, и на местото 1476 се забележани 15 случаи. (П.Р)

Не знаеја дали има гласање

Прегласувањето во општина Центар не мина без проблеми. Тие се јавија на гласачките места во Фудбалската федерација на Македонија и во Домот на градежните работници. Наша екипа вчера посети неколку гласачки места во Центар и од она што можеше да се констатира на самите гласачки места, многумина не знаеја дали има прегласување во нивните изборни единици.

„Не сум единствениот кој дојде да гласа, а се покажа дека немало потреба од доаѓање. Народот е неинформиран каде има прегласување, а дополнителна забуна внесе и пропагандиниот материјал кој што ни беше оставан во поштенските сандачиња“, раскажува жител кој дојде на гласање во основното училиште „Јохан Хајнрих-Песталоци“.

Еден ден пред гласањето, на жители на Центар им бил оставан гласачки материјал со кој што граѓаните ги информираат дека треба да гласаат следната недела. Станува збор за црно-бели флаери, слични на оние кои ги делеше опозицискиот кандидат Андреј Жерноски, со кои што тој ги повикуваше на победа на гласањето, но пишувало дека тоа ќе се одржи на 28 април, односно следната недела. Освен флаери на граѓаните им е поделено и писмо кое што е потпишано од кандидатот Жерновски и на кое исто така стои датум од следната недела. (Љ.С.)

И Волерс на избори

За време на посетата на новинари на „Утрински весник“ на избирачкото место во ФФМ, нешто пред 14 часот, се појави и американскиот амбасадор Пол Волерс. Негов претставник реферираше за се' она што тој го регистирал на гласачкото место, а потоа амбасадорот Волерс се упати кон Домот на градежните работници.