Спаска Митрова го доби детето

Гевгеличанката со бугарски пасош, Спаска Митрова, го врати старателството над четиригодишната ќеркичка Сузана. Вака вчера одлучи гевгелискиот суд на новото судење што го побара скопскиот Апелациониот суд, кој во мај оваа година ја укина првостепената пресуда, која беше во корист на другиот родител, Воислав Савиќ. Пресудата беше изречена во доцните попладневни часови, а во судницата не се појавија таткото и неговиот адвокат.

„По четири години борба, за прв пат судот се произнесе правилно и ми го врати родителското право. Сега чекаме да се потврди тоа и од Апелациониот суд, што значи дека борбата продолжува. Ова е само почеток!“, расположено коментираше Спаска Митрова, која ја даде изјавата на бугарски јазик во едно од околните кафулиња. Таа се појави таму во друштво на својот бранител, скопскиот адвокат Шпенд Деваја, како и претставници од Бугарската амбасада во Скопје. За разлика од порано, на соопштувањето на пресудата ги немаше бугарските медиуми, кои се' досега будно ги следеа сите судски процеси поврзани со „Бугарката“ Спаска и опширно известуваа за тоа.

Видно разочаран, таткото Воислав Савиќ во изјавата за „Утрински весник“ рече дека очекувал ваков расплет и затоа не се појавил на судењето.

„Одлуката е политичка и донесена под притисок. Ја издејствува министерот за правда, Михајло Маневски, кој влијаеше врз претседателот на гевгелискиот суд, а тој, пак, изврши притисок врз судијата, која во март донесе поинаква одлука. Не знам како може да не се земе предвид мислењето на Центарот за социјални работи, кој цело време беше сведок на она што се случуваше околу моето дете“, потенцираше Савиќ.

Вели дека ќе поднесе жалба до повисокиот суд, но не верува дека може да промени нешто, бидејќи е многу јасно како ќе се одвиваат работите. Засега не му е познато како ќе биде регулирано гледањето со неговата ќеркичка, но се надева дека повторно нема да ги има истите проблеми отпорано и оти детето нема да биде однесено во Бугарија.

Малечката Сузана останува во неговиот дом се' додека не добие официјално известување.

Скопскиот Апелационен суд побара повторно судење, бидејќи сметаше дека во првостепената пресуда не било земено предвид психијатриското вештачење од Невропсихијатриската болница во Негорци. Во него беше содржана констатацијата дека двајцата родители се способни за старателство. (Г.Д.)