Претходен број

Груевски во Елисејската палата

Средба на Груевски со Саркози. Франција дала поддршка да се укине шенгенската бариера

Од нашиот дописник
Тони Гламчевски

Париз - Премиерот Никола Груевски вчера во Париз ја имаше една од најзначајните државнички средби досега - во Елисејската палата разговараше со францускиот претседател Никола Саркози. Оваа средба дојде неколку месеци откако Саркози покажа многу повеќе разбирање за позицијата на Атина во грчко-македонскиот спор за името.

Разговорите во Елисејската палата траеја околу 25 минути, доволно време за брзиот и динамичен француски претседател да се запознае со македонските ставови и позиции.

Веднаш по средбата, Груевски за печатот изјави: „Имавме пријатна средба со претседателот Саркози на која ги искажавме нашите позиции во однос на повеќе прашања. Со Франција имаме одлични билатерални односи и немаме отворени прашања. Франција е држава која игра клучно влијание во ЕУ и во НАТО, затоа разговаравме за сите овие прашања. Се разговараше и за визната либерализација, при што од наша страна беше речено дека Македонија ги заврши сите подготовки и дека ја очекува одлуката за укинување на визите за македонските граѓани.

Се чини дека во сите средби што ги имав денеска за ова прашање нема спорни моменти. Како и на други места, така и овде ни беше честитано за резултатите што беа направени за визната либерализација. Исто така, истакнав дека Македонија вложува силни напори да ги започне преговорите за полноправно членство во ЕУ и во тој правец да добие датум за преговори кон крајот на оваа година, исполнувајќи ги претходно сите реформи. Не бараме да ни биде дадено нешто што не го заслужуваме. Во тој правец истакнав дека и покрај попречувањето што го имавме од страна на Грција за влез во НАТО, остануваме цврсто на патот за зачлeнување на Македонија во НАТО и во ЕУ. Продолжуваме и со реформите, но продолжуваме и со разговорите за барање решение за тој спор.

Наш интерес е тој спор со Грција да се реши. Се разбира, не ни е сеедно какво ќе биде решението и на тоа сме многу фокусирани. Побaравме и Франција да има поголема улога во тој процес, повеќе да помогне за да може процесот да се придвижи и да биде побрзо решен“, изјави премиерот Груевски.

На прашањето дали се разговарало со претседателот Саркози за прашањето за името на Република Македонија, Груевски одговори: „Ги објаснив проблемите во детали, ја објаснив позицијата на Грција, нашите проблеми во тој однос, така што претседателот Саркози е добро запознат со целата работа, што ни беше и целта, за да може соодветно во иднина да помага за придвижување на овој процес“.

Не сакајќи да навлегува во детали, Груевски во врска со проблемот со името рече:

„Јас сум задоволен од неговите позиции и искажувањето подготвеност да вложи повеќе напори за разрешување на спорот и за влез на Македонија во ЕУ иво НАТО. Воопшто не е тајна дека Франција го прифаќа зачленувањето на балканските држави во НАТО и во ЕУ, во што се подразбира и Македонија. Тој став Франција го има искажано од поодамна и постојано го повторува“.

На прашањето дали Саркози се ангажирал да разговара со Грција за да се убеди да се најде решение во врска со проблемот на името, Груевски нагласи дека Саркози покажал волја процесот да се придвижи и да се реши за да може Македонија да оди напред. „Тој сака да ја види Македонија да оди напред“, рече Груевски. Во тој контекст, македонскиот премиер упатил покана до Саркози да ја посети Македонија, а можно е во наредниот период и други високи функционери од Франција да ја посетат Македонија.

По инсистирањето на француските новинари дали тој лично е подготвен да се промени малку името на Македонија во „Горна Македонија“ или „Северна Македонија“, Груевски категорично одговори: „Имаме наши национални позиции, денес ова не е прес-конференција за решавање на проблемот со името, дозволете да ги продолжиме разговорите со Грција, да бараме соодветни решенија, кои нема да бидат на штета на државните и националните интереси на Република Македонија“.

Груевски не сакаше да одговори дали претседателот Саркози ја променил неговата позиција во однос на прашањето за името на Македонија, која да потсетиме, одеше до целосна поддршка на грчката позиција.

Прв знак дека односите меѓу Франција и Македонија се затоплуваат дојде по завчерашната средба меѓу премиерот Никола Груевски со францускиот министер за имиграција, интеграција, национален идентитет и солидарен развој, Ерик Бесон. При разговорите, Бесон го информирал Груевски дека Франција ќе го поддржи укинувањето на визите за македонските државјани. Односно, Париз ќе ја даде својата согласност за укинување на визите откако Европската комисија ќе назначи дека се исполнети условите утврдени од ЕУ.

Францускиот министер во разговорите му предложил на Груевски двете земји да ја продлабочат соработката со склучување договор за заедничко раководење на миграторските текови. Овој договор посебно би ја фаворизирал мобилноста на младите, студентите и младите професори. Ерик Бесон најави дека е подготвен да ја посети Македонија до крајот на годинава.

По завчерашното одложување на средбата, поради добро познатите технички проблеми на авионот со кој премиерот Груевски требаше од Брисел да допатува во Париз, неговата средба беше презакажана за вчера попладне.