Бенедик и К. Манев осминафиналисти на СП

Од четворицата куглари од Македонија што настапуваат на Светското првенство во поединечна конкуренција што се одржува во австрискиот град Рицинг, двајца се пласираа во осминафиналето. Тоа се Костадин Манев, кој го победи романскиот репрезентативец Крачун со 3:1 и светскиот првак од Брашов, Борис Бенедик, кој успеа за влакно да ја мине и втората рунда, совладувајќи го Србинот Јован Чалиќ. И овој пат, како и во мечот од првото коло, средбата заврши без победник 2:2, но Бенедик се пласира во третата рунда поради подобриот биланс на соборени дрва.

Третиот наш претставник што настапи во второто коло јуниорскиот светски првак Бранко Манев не успеа да ја мине оваа пречка, бидејќи налета на светскиот рекордер Вилмош Заварко од Србија и под влијание на големиот противник фрлаше мошне слабо и на крај изгуби дури со 4:0. Претходно, во првото коло беше елиминиран Урош Стоклас.

Во четвртото коло Костадин Манев ќе настапи против Словакот Иван Чех, кој, исто така, досега покажа одлична форма, а Борис Бенедик за противник ќе го има Австриецот Хубер и има големи шанси да го совлада и да се најде меѓу осумте најдобри во светот.

Натпреварите продолжуваат во дисциплината тандем, каде што боите на Македонија ќе ги бранат Дамир Фучкар и Данче Гиевска. (М.М.)