Груевски го спаси Јанакиески од „давење“

Опозицијата и власта поделени за потегот на премиерот да не ја прифати оставката на Јанакиески

Светлана Унковска

Опозицијата вчера жестоко го критикуваше потегот на премиерот Никола Груевски да не ја прифати оставката на министерот за транспорт и врски, Миле Јанакиески, поради несреќата во Охридското Езеро, во која загинаа 15 бугарски туристи. Истовремено, опозицијата смета дека со самото тоа што го амнестира министерот, премиерот автоматски ја презема одговорноста за несреќата. Владејачките партии, пак, сметаат дека самата оставка на министерот Јанакиевски е високо морален чин, но сметаат дека таа не треба да биде прифатена затоа што тој немал директна вина во несреќата. Пред да биде испратена веста на премиерот Никола Груевски дека не ја прифаќа оставката на министерот Јанакиески испратена завчеравечер, откако замина во Кина, претходеа информации дека пратеничката група на ВМРО-ДПМНЕ оваа одлука му ја сугерирала на премиерот. Од друга страна, пак, министерот Јанакиевски си ги продолжи министерските должности и веќе вчера беше во Белград на средба со својот српски колега.

СДСМ смета дека Македонија, под водство на Никола Груевски, станала банана-држава во која никој од ВМРО-ДПМНЕ не понесува одговорност за ништо.

„Стана јасно дека наводната морална оставка на Миле Јанакиески беше само смислен блеф за замајување на македонската и светска јавност. Сведоци сме на уште еден кукавички обид на премиерот Груевски да избега од одговорноста и избра срамно од Кина да брифира дека не ја прифатил оставката. По ова нема никакви дилеми дека целата одговорност ја презема Груевски и никој друг“, истакна портпаролот на СДСМ, Емилијан Станковиќ. Тој наедно и јавно праша што е тоа со што Јанакиевски го држи својот шеф Груевски за да не му ја прифати оставката.

Претседателот на ЛДП, Јован Манасиевски, вели дека воопшто не бил изненаден од разрешницата на, како што рече, „ваквата сапуница“ со оставката затоа што е јасно дека во кругот на луѓе блиски до премиерот кои се повластени и за кои не важат законите е и министерот Јанакиески.

„Во тој круг на неколку блиски соработници, покрај Јанакиески, е и министерката за внатрешни работи, Гордана Јанкуловска, министерот за финансии, Зоран Ставрески, и досега како и во иднина не може да се очекува да се применуваат исти аршини како и спрема други функционери. Она што е комично и жалосно во оваа ситуација е што во одбрана на личните пријатели на премиерот беше функционализирана цела пратеничка група на ВМРО-ДПМНЕ“, истакна Манасиевски. Тој со иронија забележа дека сега очекува истата пратеничка група да заседава и да ги одбие и најавените оставки на министрите на ДУИ.

Новите социјалдемократи сметаат дека премиерот со одбивањето на оставката му нанел само штета на министерот Јанакиески. „Чувството на морална одговорност е многу повеќе од констатирање каква било вина и тие мора да се прифатат. Сакајќи да го заштити министерот, премиерот Груевски само му нанесува штета на неговата кариера“, вели Горан Мисовски од НСДП.

И пратениците на Нова демократија го осудија потегот на премиерот Груевски, оценувајќи дека сето тоа било една смислена игра меѓу министерот и премиерот.

„Ова значи дека одговорноста сега целосно паѓа на премиерот и со ова се потврдува и критиката на премиерот на Бугарија, кој рече дека и премиерот Груевски треба да одговара за овој случај“, оценува Абедин Зумбери од Нова демократија.

Љубе Бошковски директно ги повика на одговорност и побара оставка да поднесат не само министрите Јанакиески и Јанкуловска, туку и премиерот Груевски.

„Срамниот театар со оставката на Миле Јанакиески беше нешто што од оваа власт можеше да се очекува. Наместо истиот ден Јанакиески да замине со наведната глава, чекаше Груевски да направи сценарио, па така по негов налог се јави пратеничката група со препораката да не ја прифати оставката. Ако министерот нема одговорност, тогаш логично би било тој да ја преземе одговорноста. Барам итна и неотповиклива оставката од двајцата министри и го повикувам Груевски и тој да поднесе оставка“, порача Бошковски, претседател на Обединети за Македонија.

Меѓутоа, владејачките партии не гледаат ниту вина, но ниту потреба од самиот чин на поднесување морална одговорност на министерот за транспорт и врски.

„Сметаме дека оставката на Јанакиески е високо морален чин, го цениме тоа, но сметаме дека оставката не треба да биде прифатена, бидејќи министерот нема директна вина во настанот што се случи“, истакна вчера координаторот на пратеничката група на ВМРО-ДПМНЕ, Силвана Бонева. Таа вели дека и на самата координација што ја одржале за да му препорачаат на премиерот да не ја прифати оставката, сите пратеници на ВМРО-ДПМНЕ биле единствени во тој став, затоа што увиделе дека министерот презел многу мерки и донел закони со кои се ставило ред на Охридското Езеро.

На страната на ВМРО-ДПМНЕ застанаа и пратениците на ДУИ, според кои одлуката на премиерот да не ја прифати оставката е поради тоа што тој ја поднел од морални причини, а не поради тоа што има професионални пропусти.

„Премиерот има право да не ја прифати оставката на министерот Јанакиески затоа што тој нема направено пропусти. Тука не гледам дека има политичка одговорност, иако за тоа повикуваат и надвор од нашите граници. Несреќа може да се случи каде било“, вели Сафет Незири од ДУИ. (Св.У.)