Црвенковски повика на општонароден марш

„Македонија, дефинитивно, е киднапирана држава од еден човек и од неговата фамилија“, рече лидерот на СДСМ

На 4 декември СДСМ ќе организира општонароден протестен марш во Скопје, соопшти вчера лидерот на партијата, Бранко Црвенковски. „Тоа ќе биде марш за слободата и за демократијата. Марш за правдата и за вистината. Марш за достоинството и за иднината“, рече опозицискиот шеф и потсети дека случувањата во телевизијата А1покажаа оти „можеме да бидеме заедно, да бидеме единствени, и Македонци и Албанци, и Срби и Турци, Роми, Власи и Бошњаци!“

„Прексиноќа беа заедно и партиски определени и неопределени, и левица и десница, и невладини организации и независни интелектуалци“, нагласи тој.

Според Црвенковски, СДСМ ја дава иницијативата за протестниот марш, но не ја присвојува. Оваа партија ќе помогне во организацијата, ама однапред велат дека овој марш ќе биде општонароден. Повика сите заедно да бидат единствени и да ги покажат волјата и решеноста да ја одбранат иднината на земјата.

Црвенковски рече дека, и покрај очекувањата прес-конференц��јата да им ја посвети на случувањата во и околу А1 и да ќе изрази жалење и осуда за она што се случи или да искаже предупредувања до институциите на државата, тоа нема да го стори. „Тоа се логични и нормални постапки, но во нормална демократска држава. Македонија одамна веќе не е тоа. Македонија, дефинитивно, е киднапирана држава од еден човек и од неговата фамилија, а ние, два милиона граѓани на оваа земја, сме нивни заложници. За жал, тоа е вистината, тоа е реалноста. Оваа заложничка драма, конечно, мора да се реши. Одлуката е во рацете на народот, во рацете на нас, граѓаните. Никој од нас сам не може да направи ништо, но сите заедно можеме да направиме се'“, порача Црвенковски. (Б.Ј.)