Насловна

Се' уште ли е Шекеринска во игра за премиер

И покрај тоа што нема висока функција во СДСМ, екслидерката останува една од клучните личности во партијата

Светлана Унковска



Со настапите што ги имаше на седницата за избор на новиот владин Кабинет, Радмила Шекеринска остава впечаток дека, и покрај тоа што нема висока партиска функција во СДСМ, и натаму е клучна личност во партијата. Случајно или не, Шекеринска, како еден од најжестоките критичари на новата Влада, беше последната говорничка од таборот на опозицијата, со што и' беше доделена улога да ја затвори дводневната дискусија.

Последните минути пред гласањето за новата Влада се термин што со внимание се следи и, секако, мора да биде искористен за да се постигне и главната поента. Социјалдемократите играа на сигурно и тоа и' го препуштија на Шекеринска. Дали таквиот потег укажува дека членството на СДСМ се' уште ја перцепира како кандидат за премиер по неодамнешните предвремени парламентарни избори.

„Не, не знам дали се' уште е така, но не би сакала сега да се занимавам со тоа. За мене тоа е нешто второстепено и ние сега се концентрираме на побитни работи што се од суштествена важност за граѓаните. Сега треба да бараме од Владата одговорност и поентата ни е да покажеме дека ја концентрираме нашата активност во Собранието. Сето друго е чиста политика од која на граѓаните им е преку глава“, ни изјави Шекеринска.

Таа, во својот завчерашен настап, само половина час пред полноќ, прецизно ги изнесе забелешките за владината програма, што ја опиша како текст на 60 страници во кои никаде нема одговор на клучните прашања што ја засегаат државата. За кадровските решенија, пак, забележа дека мислела оти кога премиерот Никола Груевски им се извини на граѓаните за направените грешки, мислел на погрешниот избор на министрите од претходната Влада. Но, тој повторно го предлага ист тим со исти лица.

„Ако Вашето извинување беше добронамерно и искрено, тогаш ќе значеше промени и во тимот и во програмата. Вашето извинување нема да му помогне никому, нема да им ги плати сметките на граѓаните и тие и натаму нема да можат да излезат на крај во месецот“, рече Шекеринска.

Таа го прашуваше премиерот: Зошто не кажува ниту збор што ќе направи да ја заживее демократијата? Зошто САД, како наш стратегиски партнер, почнаа да ни вртат грб? Што ќе направи за да го смени фактот дека Македонија е на најдолното скалило во Европа според сиромаштијата?...

На ваквите остри напади реплицираше Груевски, кој рече дека во нејзиниот говор имало единствено лаги и клевети. Тој ја нарече Шекеринска „дискутантка“ во која гледа само ароганција и самобендисаност.

„Тоа што јас бев избрана за последен говорник, сепак, е резултат на тоа што во партијата се води сметка тоа да биде некој со поголемо искуство и некој што знае повеќе да се носи и да упати такви напади. Од друга страна, пак, имаме и ретка можност да го најдеме Груевски за да почнеме некаква дискусија и да водиме дебати со него. И сега ни е јасно сосема зошто тој воопшто не прифаќа дуели. Се виде дека тој на ниедни прашања и критики не одговара со контрааргументи, туку само напаѓа лично“, ни изјави вчера Шекеринска.