Грција притиска, Македонија во дефанзива

Од Владата се барало да излезе јавно и условено да го прифати името Северна Македонија

Слободанка Јовановска


Грција ја притисна до ѕид Македонија околу спорот за името, но во Владата се' уште се однесуваат како ној, одбивајќи да сфатат дека проблемот не се решава кај Метју Нимиц, туку на друго ниво.

Со изјавата дека Атина е подготвена да го прифати името Северна Македонија за сите употреби, алтернативниот шеф на грчката дипломатија, Димитрис Друцас, отиде голем чекор напред пред македонската дипломатија, повлекувајќи бран реакции дека, ете, Грција е јасна, конструктивна и прави компромис, па сега е ред на Македонија да каже што сака.

Конкретно, последниве недели се покажа дека молчењето секогаш не е злато и дека пасивноста на македонската страна во однос на предлагањето решенија околу спорот ја води во позиција да се согласува или не околу тоа што нуди Грција место самата да ја води играта.

Друцас го направи тоа што подолг период и го советуваа европските функционери и дипломати на Македонија, односно таа да излезе со решенија и да го води главниот збор зошто на крајот на краиштата нам ни треба решение на спорот, а не на Грција. Уште повеќе, од Владата се барало да излезе јавно и условено да го прифати името Северна Македонија, што го предложи еднаш Нимиц на грчка сугестија за да им ги врзе на Грците рацете потоа околу спорењето на јазикот и идентитетот на нацијата.
Место тоа, Владата упорно молчи, наспроти Друцас, кој секојдневно дава интервјуа за домашни и странски медиуми, создавајќи впечаток во европските кругови дека прави голема отстапка, иако предлогот Северна Македонија сами си го предлагаат и сами си го прифаќаат. Ден по ден, Друцас ја гради конструкцијата на решението, па откако сите во светот разбраа дека името може да биде Северна Македонија, сега оди и чекор натаму, зацементирајќи го и опсегот на употреба.

Од македонското МНР вчера немаа друг коментар освен тоа дека Атина подолго време настапува еднострано и ги наметнува своите решенија во јавноста.

„Во изјавите на грчките политички преставници веќе подолго време е забележлив едностран пристап во однос на ова прашање. Ваквите јавни настапи нудат и наметнуваат прифатливи решенија само за едната страна во овој билатерален спор, свесно занемарувајќи ја суштината на разговорите под покровителство на ОН и потребата од рамноправен и конструктивен придонес на двете земји во изнаоѓањето компромисно решение“, велат од МНР.

Иако македонската позиција е поранлива и нашата држава е таа која треба да го менува името, не Грција, па излетувањето на јавна сцена може да има поголема последица, сепак, е несфатлива дефанзивата наспроти хорот од меѓународни пораки дека е добра тајната дипломатија околу спорот, ама ниту нив не им е јасна македонската позиција околу спорот.

Во изјавата што ја даде за грчки медиум неделава, Друцас ја повика македонската Влада да престане со игри и тактизирања и, ако треба, да го смени Уставот на државата за да се најде решение за спорот.

„Игрите мора да престанат. Постојано испраќаме позитивна порака и се надеваме дека ќе постигнеме заемно прифатливо решение. Решението кое би го постигнале треба да овозможува апсолутна и универзална употреба. Ако оригиналната употреба значи уставни промени, тогаш тоа треба да се направи“, порачува Друцас. Според него, Македонија сите овие години избегнувала преговори, криејќи се зад предлозите на Метју Нимиц. „Игрите завршија. Сакаме решение веднаш и тоа може да се постигне ако Скопје има политичка волја за тоа“, вели Друцас, додавајќи дека за грчката страна е прифатлив предлогот Република Северна Македонија. Според него, ако Груевски го одбие овој предлог, треба да им објасни на своите граѓани зошто го прави тоа и зошто им ја попречува европската перспектива, додека другите балкански земји напредуваат со европскиот курс.

Околу тоа дали за ЕУ е прифатила името Северна Македонија како решение за спорот одговорот го избегна вчера евроамбасадорот Ерван Фуере, кој порача дека тоа е сепак нешто за што треба да реши македонската влада.

„Двете страни под раководство на ОН треба да најдат решение. Секоја иницијатива е добредојдена и многу е јасно дека постои огромна итност да се најде решение за ова прашање. Колку побрзо се најде, толку е подобро. Веќе е договорен состанок со медијаторот на крајот на месецот и се надевам дека ќе дојде до решение“, рече Фуере. Од Брисел вчера не можеа да потврдат кога ќе се случи најавената посета на Нимиц, која беше најавена за првите десет дена, иако до десетти тешко дека функционира некоја институција во Унијата. (С.Ј.)