Поскапувањата го урнисаа стандардот

Дали да се направат неколку теглички ајвар, колку огрев да се нарача, како да се помине месецот

Александрија Стевковска


Новите цени на храната пристигнаа со првите септемвриски денови. Храната поскапува, граѓаните ги пребројуваат денарите во недоумица колку да потрошат и колку да зачуваат за да го поминат месецот. Дали да се направат неколку теглички ајвар, колку огрев да се нарача, дали да се купи од поевтините или од поскапите тетратки, ранци, прибор.

Математиката е без крај, а сметката е иста, парите никако не стигнуваат за сите потреби. Каде е тука есенската гардероба? Се поставува прашањето дали зимата може да се помине со ста��ите фармерки и блузи, или ќе треба да се купат нови, бидејќи старата облека е израсната или искината. Сите не' заплисна бран поскапувања, а трговците тврдат дека тој не е толку силен и нема значајно да го истенчи стандардот. Граѓаните негодуваат. Ги фаќа уплав при секое влегување во маркет.

„Секое одење во п��одавница или на пазар е хорор. Цените се ненормално зголемени. Речиси е невозможно месецот да се преживее со просечни или со потпросечни примања. Пазарам речиси секој ден, бидејќи не сакам однапред да затворам повеќе пари, но сфаќам дека така губам. Имам впечаток дека цените пламнуваат преку ноќ, па од ден во ден непријатно ме изненадуваат“, вели скопјанката Марија Соколова.

Наголемо се тенчи домашниот буџет, кој веќе прилично е изеден од летните одмори.

„Ништо не останува. Немаме ни вода во очите, а не, пак, денари во паричникот. Се чудиме како да преживееме. Дали да платиме комуналии, дали друго. Се' е скапо. Претерано скапо“, се жали Томе Стефановски.

Септемвриските трошоци дополнително се зголемија и со стартот на учебната година. Тетратки, моливи, ранци, нова облека. Со ученик дома, а со тенки плати, невозможно е да се опстане.

„Ние само знаеме како преживуваме. Многу е тешко, бидејќи сме невработени. Претураме од шупливо во празно. Сепак, ќе мора да скратиме од нешто друго, но за училишните трошоци и за храна мора да се најде“, вели Соња Димитрова од Скопје.

Најсвеж пример за наглиот скок на цените е млекото, чија цена во маркетите КАМ, кои важат за едни од поевтините места за пазарење, преку ноќ порасна за 4 денари, па место 43 денари сега чини 47. И кесичка кафе деновиве се продава по нова цена, плус два-три денари за 100 грама.

Во високите цени не заостануваат ниту пазарите, кои малку се олабавија, но се' уште остануваат места каде што оди голем дел од семејниот буџет. Овошјето и зеленчукот се прескапи за овој период од годината, а правењето зимница е оставено за некои подобри времиња.

Цената на лебот, пак, е приказна за себе и создава вистинска рашомонијада на пазарот. Некои пекари ја зголемија цената, други ја задржаа старата. Има леб и со намалена тежина, што значи дека и тука цената е зголемена. Кај и да е, ќе поскапи и месото. Според првичните пресметки, цената може да се зголеми и до 20 проценти. Со свои пресметки излегоа и производителите на масло за јадење, кои еден литар го поскапеа до 76 денари. Тоа е најниската цена, а не се исклучува и нова нагорна корекција.

На прагот на грејната сезона парното доби нова цена, а има зголемувања и кај цените на огревното дрво, кое лани го достигна врвот. Сето ова е само почеток на одвртување на инфлационата спирала која нема да поштеди ниту еден производ. Дека се засилува трендот на поскапувања илустрираат и статистичките податоци, покажуваат дека трошоците за живот во август биле повисоки за речиси два процента во однос на истиот период лани. Најголем скок е регистриран кај цените на основните продукти за преживување, храната и пијалаците. Токму бранот поскапувања во последните месеци ја принуди Народна банка да изврши нагорна корекција на стапката на инфлација во земјава. Според новите прогнози, не се исклучува можноста инфлацијата да достигне и два процента до крајот на годинава. Во меѓувреме, светската организација за храна предвидува цените на прехранбените производи и натаму да растат.