Со дрва го потпираат училиштето за да не падне

Дојде ли есен, учениците и наставниците во тетовско Мерово живеат во страв дека дотраената барака ќе се урне врз нив

Жаклина Ѓорѓевиќ

МЕРОВО - Куп дрва стојат потпрени на ѕидот од селското училиште во Мерово, општина Желино, кое спаѓа под централното основно училиште „Пашко Васа“ во Групчин. Кога ќе дојде есен, наставниците од ова училиште редат дрва во страв дека дотраената барака ќе се урне врз нив. Кога дува, дрвената барака се тресе, велат наставниците од ова училиште, на кои како и на учениците им е страв кога доаѓаат тука.

Парчиња од лесонит паѓаат од таванот, кој е дрвен и нема плоча што го држи кровот. „Најчесто паѓаат стакла. Ете, завчера падна стакло од прозорец, бидејќи имаше силен ветер и, за среќа, никој не беше повреден“, вели Ихмет Селими, одговорен наставник во училиштето, кое изгледа застрашувачки.

Цели пет години училиштето апелирало преку општината да се интервенира и да се спасат учениците од евентуална несреќа, но никој не реагирал. Екипи од Министерството за образование, кои пред извесно време го посетиле училиштето, се чуделе на условите во кои учат дури 140 ученици. „Им реков на надлежните дека одговорноста ќе биде нивна ако падне кровот врз учениците“, ни рече директорот Нуредин Исмаили.

Ова е само едно од трите училишта што се на листата на чекање за нови објекти во ресорното министерство.

Бараката во Мерово датира од 1977 година, како и другите две во Ново Село и Копачин Дол. Училиштето, кое е на половина пат од Скопје до Тетово и се води како планинско, личи на швајцарско сирење, со дупки и откорнати делови од надворешниот ѕид, а внатрешноста изгледа уште пострашно. Подните штици се нишаат кога газите по нив, а меѓу нив ѕиркаат и дупки. Тешка миризба се шири од влагата поради која надвиснале лесонитните плочи одделени со дрвени лајсни, за кои е прашање на време уште колку можат да ги држат. Поради тоа ,во опасност се и компјутерите, кои уште стојат нераспакувани во кутии во наставничката канцеларија. Клупите тука се стари исто колку и самото училиште, кое е предвидено да се урива идната година. Во целата оваа слика стрчи компјутерот, кој го постави Министерството како дел од проектот „Компјутер за секое дете“. „Прво дајте му на човек да јаде, а потоа нека пие ракија“, се шегуваат селаните од овој крај, коментирајќи ги компјутерите, кои станаа дел од инвентарот на овие бараки што се пред распаѓање.

„Во подот интервениравме со пур-пена со која ги пополнивме дупките, но ние не можеме да изградиме нов објект, туку само да крпиме“, објаснува директорот Исмаили. Тој тврди дека претходно не е инвестирано во училиштето до кое во зима велат дека е многу тешко да се дојде поради непроодноста на теренот и тесниот пат што води дотаму. Директорот тврди дека со свои средства интервенирале и ги уредиле тоалетите со плочки, кои се надвор од училиштето. Но, и тука има проблем, бидејќи немаат септичка јама.

Сепак, училиштето во Мерово не било на ред за уривање, туку она во Ново Село. Тоа веќе две години стои во Програмата на Министерството за изградба на нови училишта, а сега на негово место е ставено училиштето во Мерово како приоритет. За Ново Село одговорните побарале да се урне, бидејќи имале големи патни трошоци за наставниците и учениците, а и поради дотраената барака, која е стара четириесетина години, како онаа во Мерово. И оваа барака се тресе кога дува ветер, иако условите тука се подобри од оние во Мерово. Учениците и наставниците имаат проблем со вода, која ја носат со кофи од селскиот извор, но не ја користат за пиење. И тука надлежните донирале компјутер.

Дрвениот под „игра“ и во стариот објект на централното училиште, кое се наоѓа во Групчин, а датира од далечната 1933 година. Кога имаат приредби, претстави или хорско пеење, наставниците ги собираат децата на долниот кат, бидејќи се плашат дека ќе пропаднат низ дрвените штици. Но, затоа учат на нови клупи, кои се донирани за да се инсталираат училишните компјутери. „Седиме со страв. Внимаваме да не се групираме многу“, објаснува еден од наставниците во ова училиште во кое дрвените прозорци се затвораат со ш��јки, па затоа се внимава и со нив.

Неодамна постапките за изградба на нови училишта во Ново Село и во Струга беа поништени со образложение дека „поради непредвидени и објективни околности се промениле потребите на договорниот орган“. Од Министерството објаснуваат дека поради ребеланс на буџетот се намалени средствата за изградба на училишта, но нивни приоритет и натаму ќе биде инвестирање во образованието. (Ж.Ѓ.)