Наместо во Солун, на шопинг во Гевгелија?

Пред гран��чниот премин Богородица треба да се гради
трговски центар со 135.000 квадрати корисна површина

Билјана Ангеловска

Граѓаните од Македонија нема да треба веќе да одат на шопинг до Солун. Наскоро ќе имаат можност ваквото задоволство да си го дозволат дома, во Гевгелија, бидејќи непосредно пред самата граница со Грција е планирано да се гради огромен трговски центар, нешто слично, па дури и пограндиозно од солунскиот „Космос“!

Изградбата на големиот шопинг мол во близина на граничниот премин „Богородица“ е предвидена со Урбанистичкиот план, кој Општина Гевгелија го донесе годинава по нарачка на Владата, и тоа во брза постапка. Земјиштето со површина од над 30.000 квадратни метри наменето за трговски комплекс „Граничен премин Богородица“ се наоѓа од десната страна на автопатот во правец кон границата со Грција, во соседство на казиното „Фламинго“, во непосредна близина на мотокрос-патеката и на само 50-ина метри од реката Вардар.

Министерството за транспорт и врски деновиве распиша јавен оглас за продажба на градежно земјиште во сопственост на државата во општина Гевгелија. Почетната цена на јавното наддавање изнесува 1.000 денари за квадрат. Парцелата е со големина од 32.286 квадратни метри, од кои површината за градба изнесува 22.600 квадрати, а вкупната корисна површина достигнува до 135.000 квадратни метри. Со урбанистичкиот план е дозволена изградба на објект на приземје и пет ката, со висина на венец од 21 метар.

Од општината Гевгелија велат дека ова е втор обид на државата да го продаде земјиштето. Првиот пат било понудено со почетна цена од 2.000 денари квадратен метар. Дали скапиот квадрат бил причината зошто не се јавил ниеден купувач, никој не знае да каже.

Сепак, од Општината велат дека за конкретната локација постои голем интерес и тоа, пред се', од странски инвеститори.

Досега за земјиштето се интересирале Израелци, инвеститори од Дубаи, Руси, Кинези, но и Грци. Кој од нив колку сериозно е заинтересиран да стане газда на ова, како што велат гевгеличани, исклучително атрактивно земјиште, ќе се знае набрзо по завршување на оваа лицитација.

А, дека земјиштето се наоѓа на многу добра локација, доказ е новиот урбанистички план што го изготвува Општина Гевгелија. Овој план се однесува на урбанизација на нови 12 хектари, кои опфаќаат земјиште од двете страни на автопатот, а на кои се предвидува изградба на туристичко-угостителски комплекс од хотели, ноќни клубови, спа-центри. Планот треба да биде донесен веќе до крајот на годинава, а со него се брза бидејќи, како што дознаваме, имало најави дека некоја индиска групација е заинтересирана да гради хотели од синџирот „Ројал таунус“.

Изградбата на големите молови и хотелски комплекси во Гевгелиско, несомнено ќе придонесе за брз развој на општината Гевгелија која само од комуналиите што ќе ги наплати за сите овие објекти, а изнесуваат по 25 евра од квадрат, прилично ќе ја наполни својата каса.

Но, граѓаните ќе можат да шопингуваат и во другите градови низ државава. Ако не им се патува до граница, скопјани, покрај веќе многубројните трговски центри, за некоја година ќе можат да трошат пари и во двата нови кои допрва ќе се градат на територијата на општина Гази Баба. Државата понуди на продажба две парцели во оваа општина и тоа една во Маџари, веднаш зад истоименотото кино, со големина од 4.058 квадратни метри на која е дозволено на површина од 1.949 квадрати да се изградат вкупно 5.130 квадратни метри. Трговскиот центар може да биде висок најмногу 13,20 метри и да има две приземја и два ката. Во Хиподром, пак, се продава парцела од 2.328 квадратни метри, од кои под градба можат да бидат само 960 квадрати на кои може да никне објект на приземје и еден кат со максимална висина од 10,2 метра. И двата плаца се продаваат со почетна цена на земјиштето од 5.400 денари за квадратен метар.

Голем трговски центар ќе се гради и во општина Свети Николе, каде за почетна цена од 2.400 денари квадрат се продава земјиште со вкупна површина од 4.400 квадратни метри. Трговски комплекси ќе се градат и во Струга на површина од 2.000 квадратни метри, на левата страна од патот Струга - Ќафасан, но ова земјиште се' уште не е понудено на продажба.