Насловна

Топ-листа 25 на локални богаташи

Градоначалници и градежници се најголеми македонски моќници од повеќе градови

Татковците го почнале, а нивните синови, ќерки, браќа и братучеди го надградуваат богатството

Сами не ги кажуваат точните милиони со кои располагаат, „Утрински весник“ се обиде барем приближно да го долови нивното богатство


Маја-Томиќ
Соња Маџовска

Градоначалници и градежници се најголеми македонски локални моќници. Иако сами не ги кажуваат точните милиони со кои располагаат, „Утрински весник“ се обиде барем приближно да го долови нивното богатство. Татковците го почнале, а нивните синови, ќерки, браќа и братучеди го надградуваат богатството. Со други зборови, во најголем број случаи станува збор за семејни бизниси, со кој управува најтесниот круг од семејството. Во нашата листа на локални богаташи фигурираат бизнисмени од Штип, Битола, Охрид, Гостивар, Тетово, Кавадарци, Крива Паланка, Прилеп, Струмица и од Кратово.



Штип располага со повеќе локални моќници.

Барзови

Барзови важат за едно од најбогатите семејства во Македонија. Еден од браќата, Констадин Барзов, е 90 отсто сопственик на фабриката за обувки, познатата „Баргала“, најголема на Балканот, со над 1.000 вработени и со годишно производство од 1,2 милиона пара чевли, кои се продаваат во разви��ните земји. Барзови ја поседуваат и фабриката за земјоделска механизација во Виница, нивна е и ТВ Ирис во Штип, трговската фирма „Балеко“ и штедилницата „Ал коса“. Имаат повеќе станови во Македонија, моментно градат мал мотел на Беровско Езеро, а на Абланица кај Берово имаат викенд-куќа. Во Штип се говори дека имаат куќа и на Флорида, а и дека поседуваат фабрика за чевли во Италија.



Мите - Брилијант

Мите Николов е сопственик на фабриката за масло „Брилијант“. Покрај неа, тој има и градежна фирма што гради станбени згради на просторот на поранешна Југославија, а најмногу во Белград. Неговото богатство се проценува на десетици милиони евра.



Славе Ивановски и Љупчо Манџуков

Славе Ивановски и Љупчо Манџуков се сопственици на „Оаза“, која вклучува повеќе хотелски и угостителски објекти. Нивни е централниот хотел „Оаза“ во центарот на градот (поранешен „Астибо“), ресторанот „Мал одмор“, „Црвено и црно“ и други ресторани. Тие се сопственици на оранжерии во Виница, Богданци, Валандово и во Штип. Имаат бизнис со откуп на кожи, јагниња, волна и друго. Моментално се инвеститори на голем станбено-деловен комплекс „Црвено и црно“ , на најпрометната трговска улица „Ванчо Прќе“ во центарот на Штип. За двајцата ортаци се говори дека имаат скапи јахти на Егејско Море и многу станови и вили во Македонија и надвор од неа.



Роберт Димитров

Роберт Димитров е сопственик на кабелската ТВ Роби. Има разгранет бизнис како кабелски оператор во дваесетина града во Македонија, меѓу кои и во Скопје. Негова сопственост е и поранешното големо трговско претпријатие „Елмар“, кое го има најдобриот деловен простор во трговскиот центар низ градот. И тој се занимава со инвестиции во градежништвото, моменто гради голем станбено-деловен комплекс во населбата Сењак. Го поседува најголемиот дел од тровскиот центар во Штип и рента голем број трговски дуќани во овој град.



Илија Бреслиски

Илија Бреслиски е газда на штипски „Бетон“. Беше директор на оваа фирма, а потоа стана и сопственик на околу 20 отсто од оваа градежна компанија. Посебно му се „позлати“ бизнисот со изградба на дел од објектите во проектот „Скопје 2014“, па оваа година гради насекаде во Скопје. „Бетон“ Штип забележа неверојатен раст на добивката од дури 1.700 проценти годинава. Ако лани фирмата остварила профит од само 107 илјади денари, или минорни 1.700 евра, годинава во првите три месеци добивката се искачила на 28.000 евра, или 1,7 милиони денари. Оваа компанија беше вклучена и во изградбата на ’Злетовица’- регионален хидросистем, а беше и партнер со пробиштипски „Стрмош“ во тамошната фабрика за зеолити.



Зоранчо Митревски

Зоранчо Митревски, сопственик на винарницата „Езимит“, важи за љубител на скапи, луксузни возила од типот на „ферари“ и „порше“, по што е познат во Штип. Се говори дека има винарници и во Италија. Тој е и почесен амбасадор на Литванија во Македонија, па на неговата деловна зграда покрај реката Отиња се вее и знамето на оваа држава.



Гостивар

Насер Идризи

Насер Идризи, директор на друштвото за промет на стоки и услуги „Гетро“ од Гостивар, гостиварската јавност го вбројува меѓу најбогатите во поширокото подрачје. Идризи долги години е на печалба во Загреб, каде што има трговски продавници, а се зборува дека во Италија имал фабрика и продавница за чевли. Во почетокот од осамостојувањето на Македонија ја купи стоковната куќа во центарот на Гостивар од скопски ИГМ, која целосно ја реконструира и во неа создаде 77 посебни локали. Потоа Идризи го купи и имотот на ТП „Гостиварска трговија“ со десетина локали во централното градско подрачје и со магацински простор во индустриската зона. Пред 6-7 години ја купи и зградата на Стопанска банка, која ја урна до темел и изгради современ трговски центар. Напоредно со изградбата на овој центар, се одвиваше и градбата на „Сити центар“. Во последниве години Идризи изгради две станбени згради со по неколку ката, а во приземјето се наоѓаат супермаркети.



Кавадарци

Илија Гечев

Илија Гечев, сопственик на „ИГМ трејд“ од Кавадарци, меѓу кавадарчани важи за еден од најбогатите. Постојано го проширува производниот процес од областа на црната металургија. Гечев честопати знае да повтори дека „ИГМ трејд“ денес е најголема г��инфилд-инвестиција во Македонија, а главни таргети се извозот, инвестициите, вработувањата и профитот. Годишното производство на „ИГМ трејд“ изнесува 120.000 тони заварени цевки профили, од чие производство само 10 отсто е за домашниот пазар, а другото се извезува. Компанијата брои 250 вработени, главно, луѓе од Тиквешијата.



Митко Јанчев

Митко Јанчев меѓу кавадарчани важи за успешен менаџер. Сопственик е на приватното претпријатие „Кожувчанка“’. Од 1995 година неговата фирма се занимава со производство на минерална вода, а веќе големи успеси забележа и во лиценцното производство на сокови од палетата на „Синалко“. Јанчев неодамна најави дека во соработка со германска компанија ќе инвестира и во изградба на пиварница во Кавадарци.



Охрид

Бошко Илоски

Вообичаено се вели дека е најтешко да се заработи и да се „испере“ првиот милион долари, а потоа се' оди лесно. Многу наши Македонци можат со својот пример да ја посведочат оваа максима. Ги има, пак, и такви, што навистина го „отсонуваа американскиот сон“. Од продавачи на весници - до мултимилионери. Еден од нив е и охриѓанецот Бошко Илоски, велат - на прво место според парите и капиталот во овој град. Илоски навистина е случај достоен за филмските ленти. Роден е во сиромашното планинско село Црвена Вода, на дваесетина километри од Охрид, во многудетно и многу сиромашно семејство од 9 деца. Уште од млад почнал самиот да си го заработува лебот. Еден од соселаните му ја дал првата хартиена торба со која почнал да продава весници на охридските плажи. Животот потоа го носи во Германија. Преку лето доаѓал во Охрид, организирал забави навечер, на заљубените им продавал цвеќе во охридските ресторани... Потоа се случи ТАТ кога на судскиот процес во Охрид, поранешниот градоначалник на Битола, Силјан Мицевски, докажа дека милион марки му биле позајмени токму од гастарбајтерот од Германија - Бошко Илоски. Заедно со популарниот битолчанец, Силјан Мицевски-Циле, ја подигна и градежната фирма „Пелистер“, преку која подоцна ја започнаа градежната експанзија во Охрид. Следуваше новиот бизнис-потфат.

Продавачот на весници ги купи двата хотела топтан, „Парк“ и „Горица“, заедно со големата Свадбарска сала, но и со земјиштето. Илоски има свој хотел во Цавтат што важи за едно од најубавите места на Јадранот. До „Инекс-Горица“ во Охрид имаше свој хотел - „Македонија“, веднаш до „Црвената вила“. На местото на хотелот „Парк“ Илоски, како сопственик на една од своите фирми, инвестира, а како сопственик на друга - гради станови за пазар. Официјално - туристички резиденции и апартмани во екстра елитната зона. Буквално под резиденциите на шефот на државата. Се зборува дека квадратен метар чини 3.000 евра. Во секој случај, на една поранешна хотелска зона од прва категорија, каде беше сместен еден од синонимите на охридското и македонско хотелиерство, се гради огромен објект, додека, пак, информациите до кои допираме велат дека до него ќе никнат барем уште два такви.



Битола

Силјан Мицевски

Првата асоцијација на битолчани за богатство, раскош и моќ се поврзува со името на ексградоначалникот на Битола, Силјан Мицевски-Циле. Циле, според познавачите на состојбите, е најкрупната риба во Битола, но и човек што може да го мери својот капитал со најбогатите бизнисмени во државата. Мицевски е првиот човек на градежното претпријатие „Пелистер“, неговото семејство поседува близу 50 аптеки „Еуро фарм“ низ цела Македонија. Поседува капитал и во повеќе компании низ Македонија што се занимаваат со градежништво. Мицевски и неговата сопруга своевремено одлежаа притвор осомничени дека се дел од аферата „ТАТ“. Инаку, важи за човек што со години помага во битолскиот спорт, културата, а им помогнал и на голем број битолчани.



Живко Радевски

Поранешните менаџери на битолската млекарница ИМБ по продажбата на фабриката станаа милионери. Еден од нив е и бившиот прв човек на млекарницата, Живко Радевски. Од продажбата на акции во ИМБ, Радевски се офајди со над 5 милиони евра. Сега се обидува да отвори друга млекарница и повторно да се зафати со работа во млечниот бизнис, но засега неуспешно.



Вангел Гагачев

Ретко некој од имотните битолчани ја посакуваат славата на богатите. Пример за тоа е Вангел Гагачев, поранешен генерален директор на ЗК „Пе��агонија“. Битолчани за Гагачев велат дека е еден од најбогатите пензионери, но во исто време и најскромен. Тој поседува голем дел од акциите, не само во ЗК „Пелегонија“, туку и на Стопанска банка - Битола.



Трајче Масалковски

Сопственикот на бензинската пумпа „Пелагонија петрол“ е исто така на списокот на најбогати битолчани. Тој поседува акции во Стопанска банка - Битола, а располага и со голем недвижен имот во градот. Во негова сопственост е и зградата на поранешниот хотел „Македонија“ на Широк сокак.



Спире Момирчевски

Поранешниот сопственик на битолската млекарница „Идеал шипка“, Спире Момирчевки, котира високо на списокот на богати битолчани. Од продажбата на млекарницата инкасираше неколку милиони евра. Сега е дел од бизнисот со градење станбени објекти низ Битола. Голем дел од објектите во центарот на градот се во негова сопственост, а работи и со фабрика за сувомесни производи.



Јорго Шундовски

За битолчани прв на списокот за најбогат политичар без конкуренција е поранешниот министер за транспорт и врски, Јорго Шундовски . Тој има проектантско биро и е главен кројач на урбанистичките планови во Битола без оглед која власт е во опција.



Прилеп

Благоја Самакоски

Благоја Самакоски е сопственик на компанијата „Микросан“ и татко на министерот без ресор, Веле Самак. „Микросан“ произведува високотехнолошки производи.



Кирил Самарџиоски

Кирил Самарџиоски е сопственик на 65,5 отсто од акциите на „Прилепска пиварница“, а неговиот син Сашо поседува 5,44 отсто акции во компанијата. Ги произведуваат македонските брендови „Златен даб“ и „Крали Марко“, како и најквалитетните светски пива „туборг“ и „царлсберг“.



Симон Наумоски

Симон Наумоски поседува 25,08 отсто од акциите на „Витаминка“, а неговиот син Сашо Наумоски го води бизнисот со производство на кондиторски производи.



Кратово



Во Кратово нема дилема дека семејството Иванови се главни локални моќници.

Според официјалните податоци што ги пополнил пратеникот Љубисав Иванов-Ѕинго во анкетниот лист за имотната состојба, стои дека неговиот имот вреди околу половина милион евра, во куќи, возила, акции...

Инаку, според податоци од Централниот депозит за хартии од вредност, тој поседува 54,26 отсто од обичните акции во Рударско-индустрискиот комбинат „Силекс“. Но, бидејќи оваа компанија не котира на Берзата, нема обврска да објавува податоци за тоа колку вкупно обични акции има издадено фирмата за да се пресмета колку вредат. Неговиот син Горан Иванов, исто така, има 8,9 отсто од акциите на „Силекс“, а е сопственик и прв човек на Сител телевизијата. Семејството Иванови се сопственици и на брендот „Добра вода“, се споменува дека некои од најтесното семејство има и фармацевтски бизнис, спортски клуб, а се поврзуваат и со други бизниси во Кратово и во Скопје.



Крива Паланка

Арсенчо Алексовски

Најбогат во Паланка е првиот човек на Општината, Арсенчо Алексовски. Неговиот вкупен имот објавен во анкетниот лист на Антикорупциска тежи ни помалку ни повеќе, туку над 5 милиони евра, или поконкретно, 5,4 милиони евра. Тој е сопственик на неколку фирми, меѓу кои „Траншпед трејд“, поседува и една третина од „Оптикал“ - Куманово, а е газда и на компанијата „Беверли ДОО“ од Крива Паланка. Во анкетниот лист се наведени и куќите што ги поседува колку вредат, возилата, акции и повеќе од десетина сметки во повеќе банки.



Кочани

Ратко Димитровски

Исто така, и во Кочани најбогат е првиот човек на Општината, Ратко Димитровски. Според анкетниот лист, тој поседува вкупен имот од речиси 3,5 милиони евра. Неговото семејство го води бизнисот во печатницата „Европа 92“.



Струмица

Зоран Заев

Уште еден градоначалник на врвот на топ-листите на локални моќници е првиот човек на Струмица, Зоран Заев. Според неговиот анкетен лист, неговото богатство вреди околу 760 илјади евра, но според струмичани, неговото семејство тежи многу повеќе. Тој ја започнал професионалната кариера во „Тргопродукт“, а бил и директор на истото претпријатие. Бил член на Управниот одбор на штедилницата „Пеон“, како и на Управниот одбор на индустријата за градежни материјали „Еленица“, како и претседател на Управниот одбор на ЈПКД „Комуналец“ од Струмица.

Семејството Заеви се поврзува со повеќе фирми, меѓу кои „Пеон брокер“, „Тотал инженеринг“, „Тотал електрик“, „Пеон-трго продукт“, „ИГМ Еленица“, „Сара инженеринг“, „Омни градба“, „Делукс инженеринг“, на дел од овие фирми сопственици не се само членови од семејството Заеви, туку и негови бизнис-партнери.



Тетово

Глигорие Гоговски

Глигорие Гоговски е сопственик на 11,37 од акциите на тетовски „Тетекс“, а Иванка Гоговска поседува 6,79 проценти од капиталот на компанијата. Волнарскиот комбинат „Тодор Циповски-Мерџан - Тетекс“ поседува 40,67 од акциите на ТТК банка, а 25 отсто се акции на ЕБРД.



Љазим Дестани

Љазим Дестани важи за еден од најбогатите тетовци. Сопственик е на компанијата „Еколог“, која ја формирал пред околу 15 години. Основната определба била со работна сила да ги опслужува камповите за мировни операции во земјите со воени конфликти, како што се Ирак, Авганистан и други. За таа цел, остварува соработка со НАТО и армиите на повеќе земји што учествуваат во мировни операции. Има свои подружници во Германија, Турција, САД, Кувајт, а во последно време и Кина. Сопственик е и на фабрика за производство на џинс-облека со седиште во Приштина во Косово со околу 1.000 вработени. Во минатата година е прогласен за почесен граѓанин на Тетово.

(Во изготвувањето на текстот учествуваше и дописната мрежа на „Утрински весник“)