Поглед

ГРОМ дочекана со потсмев во левиот табор

Даниела Трпчевска

Граѓанската опција на Македонија (ГРОМ), новата партија која од денеска ќе си го бара своето место под сонцето на политичката сцена во земјава, уште не формирана наиде на бројни реакции, цинични дофрлања и потсмев на социјалните мрежи, и тоа од страна на довчерашните сопартијци на Јакимовски.

ГРОМ, која се промовира како „партија на центарот, која ќе ги обедини и ќе ги собере на едно место хуманоста, добрината, љубовта кон земјата и ќе биде јадро на сите успешни и вредни луѓе во заедничка мисија за Македонија“ дел од граѓаните ја доживуваат како трета опција на која треба да и се даде поддршка и шанса, конечно да ја разбие полазирираната политичка сцена на десница и левица. Но, наспротив нив, постои и друг табор, кој формирањето на новата партија го дочека на нож, исфрлајќи канонада обвинувања дека лидерот на новата партија, Стевчо Јакимовски тргнал на сигурен пат да стане ДОМ 2, а дека за СДСМ е крајно време „партиската ружа да ја заменат со коприва“, оти „ГРОМ не удира во коприва“.

Додека Јакимовски на големо се подготвува да го лансира новиот политички субјект, најавувајќи дека планира на изборите да биде власт, а не опозиција, неговите довчерашни сојузници со скепса гледаат кон новите партиски сојузништва. Откако довчерашниот социјалдемократ беше исклучен од партијата, поради непочитување на препораките за бојкот на локалните избори, почна тивкото ривалство со неговите поранешни сопартијци, кое често знаеше да ескалира и со јавни препукнувања и навреди.

Тие доживеаја кулминација на социјалните мрежи, каде се коментира дека Јакимовски по неговата песна со која ја прослави победата „Не може нам нико ништа-јачи смо од судбине“, сега повторно одлучил името на неговата партија да биде инспирирано од српската естрада и песната на Цеца „Громе мој“.

Други пак со потсмев додаваат дека Јакимовски очигледно се уште тагува по поранешните сопартијци, штом партијата одлучил да ја именува по домашниот миленик на Црвенковски кучето Гром па во тој контекст предлагаат и конгресот на СДСМ, на кој ќе се избира нов лидер, да започне токму со песната „Тандерстрак“ – Грмотевица на позната група АЦ/ДЦ.