Ветеран на ОВК фатен со лажен македонски пасош

Српските цариници завчера уапсиле Косовец на преминот Градина на границата со Бугарија, кој имал фалсификуванни два пасоша, македонски и косовски, и лажни 100.000 американски долари во готово, пишува српскиот весник „Прес“.

Според информациите што ги објавува весникот, лицето бил поранешен припадник на т.н. ОВК, а управувало автомобил „голф 2“ со скопски регистарски ознаки. Двата фалсификувани пасоша имале различни имиња, а покрај доларите, кај Косовецот биле најдени и запленети 20 бланко-платежни картички и 400 лажни евра.

„При претресот, кај лицето најдовме две патни исправи, една македонска и една косовска. Македонскиот пасош е фалсификуван на тој начин што на оригиналниот образец биле испишани лажни податоци за неговиот идентитет. Македонскиот пасош гласи на име Бедри Џемаили, а другиот на име Исмаил Љамалари. Со оглед на тоа дека има двоен идентитет и дека е куц, претпоставуваме оти станува збор за ветеран на ОВК, кој подоцна почнал да работи за криминалци. “, изјавил Владимир Стојановиќ, шеф на царинската подружница на Градина. (Нетпрес)