Насловна

Патриотите кришум купуваат вили во Грција

На големо се зборува дека познат бизнисмен и градоначалник купил вила во Платамона за повеќе од 400.000 евра

Соња Маџовска
Сања Наумовска



Луксузна вила од 175 квадратни метри на три ката во Сани Бич чини 540.000 евра. Со двор од 1.000 квадрати и сопствен базен, ова е најатрактивен недвижен имот, за кој летово се интересирале македонските богаташи, а во својата понуда ја има една од скопските агенции за недвижен имот. Нашите граѓани најмногу прашуваат за купување вили и апартмани на Халкидики. Од туристичките места, најинтересни се Ханиоти, Пефкохори, а под Олимп во Платамона.

Веќе на големо се шпекулира кој од македонските богаташи се подновил со вила, апартман или со земјиште во Грција. Се зборува за познат бизнисмен и еден градоначалник кој купил вила во Платамона за повеќе од 400.000 евра. За еден од поранешните градоначалници одамна се знае дека има свој апартман во Пефкохори, а се слуша и дека други македонски бизнисмени, но и адвокати купиле градежно земјиште на кое самите ќе градат. Така е и поевтино. Квадрат неизградено земјиште во внатрешноста на Грција познавачите велат дека може да се најде од 10 евра, па нагоре, а до 500 евра на море. Но, кога се во прашање луксузните вили, цените се многу повисоки тие се движат до 2.000 евра за квадрат, барем во оние туристички места за кои најмногу се интересираат Македонците.

„Односите меѓу Македонија и Грција, но и ефектите од кризата создаваат засега неизвесност. Но, Грците очекуваат вистинска наезда од македонски и од српски купувачи на нивните вили, апартмани и земјиште доколку се смират состојбите и на економски и на полити��ки план“, вели еден наш бизнисмен и добар познавач на состојбите кај јужниот сосед. Според него, не само богаташите, во скоро време и Македонците од средната класа ќе можат да најдат нешто за својот џеб во Грција.

А и нашите агенциите за недвижен имот летово не спиеле. Поради интересот на нашите купувачи, сезоната ја искористиле да стапат во контакт со своите колеги во Грција. Во нивната понуда веќе има поголем број атрактивни вили, односно апартмани што ги нудат. Цените се движат околу 2.000 евра за квадратен метар во зависност од локацијата.

Иако летото изминува, главен проблем е тоа што ниту грчките агенции се' уште не ја знаат постапката на каков начин странски државјани ќе можат да се стекнат со имот. Засега, велат од агентите, само ги прибираат понудите од грчките агенции и им ги презентираат на нашите заинтересирани купувачи.

Најинтересни за купувачите, покрај вилата на Сани Бич, биле два апартмана во Ханиоти. Со базен пред вилата и во непосредна близина на плажата, помалиот апартман од 45 квадрати се продава за 90.000 евра, а поголемиот од 60 квадратни метри чини 110.000 евра. Во Пефкохори, апартман на прв кат, со три спални, на површина од 90 квадрати се продава за 164.000 евра. Во Геракини апартман од 70 квадратни метри чини 120.000 евра.

Во почетокот на септември, велат во агенциите, очекуваат да ги добијат грчките правилници за правната постапка за купување надвижен имот. Со тоа ќе се обезбеди сигурност за сите заинтересирани, и за купувачите и за продавачите на имоти. Заинтересираноста на нашите граѓани за купување имот кај јужниот сосед ги поттикнала и грчките агенти да ја посетат нашата земја. Се очекува тие деновиве да ја збогатат понудата на нашите агенции со уште повеќе вили и апартмани покрај море. Овој пат очекуваат во агенциите да има поширока понуда и на помали и поевтини апартмани покрај море.

Со последните измени донесени пред неколку месеци во Грција, сопственици на недвижен имот можат да бидат и граѓани на соседни земји кои не се членки на ЕУ, но само во пограничните региони. Сепак, во случајот меѓу Македонија и Грција, во домашните агенции, кои се подготвени да посредуваат во купопродажбите, очекуваат проблеми поради непризнавањето на македонскиот пасош кога ќе треба да се официјализира имотот во грчкиот катастар.