Претходен број

Македонија не смее да го изгуби чекорот за НАТО

Дали воопшто постои алтернативен концепт за иднината без НАТО, прашува Црвенковски

Светлана Унковска

На прославата на 16. роденден на Армијата на Република Македонија (АРМ) претседателот и врховен командант Бранко Црвенковски, во обраќањето на свеченоста, испрати јасна порака дека Македонија мора да го фати чекорот со другите земји на Балканот кои се пред вратите на НАТО, затоа што за нашава земја е опасно да остане надвор од евроинтегративните процеси на подолг рок.

Министерот за одбрана, Зоран Коњановски, во говорот пред присутните, пак, рече дека очекува наредната година, кога ќе бидат одбележани 60 години од постоењето на НАТО, Македонија да слави заедно со Алијансата како нејзин рамноправен член.

Црвенковски истакна дека регионов започна да се движи во насока на приближување и интегрирање во евроатлантските структури, па затоа Македонија ќе мора и натаму да покажува голема иницијативност и учество во проектите со регионално значење и да промовира соработка со земјите од нашето опкружување.

Иако спорот што го наметна Грција како пречка во нашето зачленување во Алијансата на Самитот во Букурешт е нелегитимен и непринципиелен, рече Црвенковски, тој мора да биде решен.

"Овој факт пред нас го наметнува прашањето какви се перспективите на Македонија ако остане подолг период надвор од евроатлантските интеграции и дали воопшто постои алтернативен концепт за иднината на земјата. Притоа е погрешно и опасно за нашата иднина ако некој мисли дека е можно да останеме подолг период надвор од евроатлантските интегративни процеси", рече Црвенковски.

Честитајќи им го денот на припадниците на македонската војска, министерот за одбрана, Коњановски, ја потврди определбата и подготвеноста на Армијата да биде дел од Северноатлантската алијанса, што се потврди со учеството во многу мировни мисии.

На одбележувањето на Денот на АРМ им беше оддадена почит и на загинатите македонски војници, како и на единаесеттемина мировници кои во јануари годинава, враќајќи се од мировната мисија АЛТЕА во Босна, ги загубија животите во хеликоптерска несреќа.

На церемонијата што се одржа пред Министерството за одбрана и Генералштабот на АРМ присуствуваа претставници на државно-владиниот врв, поранешниот претседател Киро Глигоров, претставници на НАТО, на верските заедници, како и ексминистерот за одбрана Лазар Еленовски.

Премиерот Груевски не дојде на свеченоста во Министерството за одбрана, но им испрати честитка на припадниците на АРМ, во која рече дека армиските реформи се заокружени и дека се исполнети сите критериуми за членство во НАТО.

"Без разлика на политичките препреки со кои се соочува Македонија на патот за добивање покана, остануваме целосно фокусирани на нашата определба за пристапување во НАТО", рече Груевски во честитката.

На вчерашната свеченост со посебни укази беа унапредени генерали на АРМ и објавени пензионирања на воени генерали. Претходно висока воена и државна делегација положи венци и свежи цвеќиња на гробот на загинатиот претседател Борис Трајковски, на гробот на генерал Михајло Апостолски и на партизанските гробишта во Бутел.