Архитектите бараат преиспитување на проектот „Скопје 2014“

Асоцијацијата на архитекти на Македонија му предлага на директорот на Управата за заштита на културното наследство, Паско Кузман, соработка на полето на превреднување на Деталниот урбанистички план за Малиот ринг. Сметајќи дека Асоцијацијата и Управата имаат интереси што се преклопуваат, за архитектите е сосем логично да укажат на аномалиите на проектот „Скопје 2014“, а наедно и да побараат негово преиспитување.

„Се надеваме дека имате префинетост и доблест да ја препознаете и вреднувате добрата намера на архитектите кои сакаат да дадат придонес во остварување на вистинските вредности на овие простори. Коментарот се однесува на центарот на метрополата како наше огледало, рефлексија на состојбите, историска одговорност, но и судбинска определница“, се вели во отвореното писмо кое ААМ му го испрати на Кузман.

Професионалната забелешка на архитектите се однесува на мислењето од Управата за заштита на културното наследство од 20 јануари оваа година дадено околу измените на ДУП „Мал ринг“, според кое законската регулатива налага изработка на заштитно конзерваторски основи за секој план, значи и за негова измена, а режимот за заштита не ги дозволува предложените интервенции. Поради тоа, архитектите очекуваат директна интервенција во насока на почитување на искажаното мислење.

„Предлагаме да се преиспитаат сите интервенции во врска со проектот ’Скопје 2014‘ што се со претензии на создавање нов печат на времето и носат предзнак на нова естетизација. Тежината на одговорноста за културолошките случувања во овој период пред идните генерации ја понесуваме заедно. Заради демонстрација на вистинска зрелост на нашите ставови, а со соочувања и примена на искуства, нудиме заедничка активност на превреднување на планот. Тоа би бил најмал одговор на почнатото сквернавење на нашето градежно и културно наследство во центарот на Скопје“, се вели во писмото. (Б.А.)