Насловна

Амбасадата во Канбера ќе се сели во добиената зграда

Канбера - Владата на Австралија го оценува барањето на Македонија зградата во Канбера што ја доби земјата во владение по поделбата на имотот на поранешна СФРЈ, да ја претвори во своја нова амбасада. Амбасадорот Перо Стојановски во изјава за „Канбера тајмс“ потврдува дека Македонија ќе бара да се направи зградата на Редхил (Црвен Рид) нова амбасада.

„Ние сега треба да донесеме одлука што ќе се случи со зградата. Но, секако, нашата предност би била да се преселиме таму“, вели Стојановски. Тој потсетува дека амбасадата плаќа 10.000 долари месечно за просториите што моментно ги користи во областа Јаралумла.

Барањето да се премести амбасадата ��ега треба да помине низ неколку процеси за да се одобри. Тоа ќе зависи од можностите зградата да биде адекватно обезбедувана, што е обврска за австралиската држава согласно со Виенската конвенција за дипломатски односи.

Македонија во минатата недела формално ја презеде контролата на зградата и го постави македонското знаме. Објектот на Редхил првично функционираше како амбасада на Југославија, а беше користен и за сместување на српските дипломати што престојувале во Канбера. Вредноста на зградата во 2010 година беше проценета на 935.000 долари. (МИА)