Насловна

Милчин: Не сум кодош, ова е мој политички линч

Од Комисијата за лустрација потврдуваат дека „Драматург“ нема потпишано документ за соработка со службите и дека не земал пари

Светлана Унковска


„Ова е политички линч на Владимир Милчин, а крајната цел на тој линч е Институтот отворено општество - Македонија затоа што таа фондација е еден од истрајните бранители на демократијата слободите и правната држава во земјава. Немам намера да дозволам стравот да ми ја затвори устата и да ми го блокира умот. Само се плашам дека мојот предмет нема да биде последен“, со овие зборови професорот на Факултетот за драмски уметности, Владимир Милчин, вчера ги отфрли наводите дека тој некогаш соработувал со тајните служби.

Комисијата ��а лустрација на седницата во четвртокот донесе решение дека не може да ја верификува изјавата на Милчин, бидејќи, наводно, постоеле документи што докажувале дека тој во еден период бил соработник на тајни служби. До вчера попладне решението се' уште не му беше доставено на Милчин, бидејќи, како што тврдат од Комисијата, не го нашле дома.

Милчин вчера на прес-конференција дојде со целото свое досие „Драматург“ на 217 страници, кое е пишувано уште од 14 јануари 1977 година кога и почнале да го следат. Во досието е запишано дека бил опасно лице со анархолибералистички позиции, односно критички настроен кон власта, дека учествувал во демонстрации, соработувал со белградскиот весник „Студент“, основач на „Фокус“ и на театарската група „Свети Никита Голтарот“. Голем дел од материјалите се однесуваат на негово следење, прислушување и контрола на поштата, од кои половината се телефонски разговори со неговите родители, кои сега се починати.

„За периодот за кој претседателот на Комисијата за лустрација, Томе Аџиев, тврди дека сум бил соработник во 1983 година, јас бев ’предмет на оперативна обработка’ и моето досие доби псевдоним ’Драматург’. Не може во исто време да бидете предмет на обработка и да бидете соработник со тајни служби. Се работи за лаги, монтажа и моја дискредитација, а лустрацијата служи за политичка пресметка со неистомислениците, во кои страдаат процедурата, правото, фактите, демократијата, правната држава и граѓаните“, истакна Милчин. Тој ја обвини Комисијата дека ги крши процедурите и предвреме му лепи етикета, а дека целата работа ја води претседател чиј мандат е одамна изминат.

На прашање дали се работи за истото досие што тој го има од Управата за безбедност и контраразузнавање или за друго досие доставено од Државниот архив, Милчин вели дека таа приказна за паралелно досие е невозможна и ако воопшто постоело требало да му биде доставено во 2.000 кога поднел барање за увид во неговото досие. Аџиев, пак, истакнува дека такво нешто е можно поради тоа што постојат три безбедносни органи и сите три можат да водат независно еден од друг досие.

Решението на Комисијата за лустрација, сепак, не е донесено со целосна согласност на членовите, од кои неколкумина барале прво да се добијат извештаи и од другите безбедносни органи со кои соработува Комисијата.

„Се работи за големо досие што е од Државниот архив и тоа лице било следено, но во еден дел од следењето има прифатено и да соработува. Сметам дека нема потреба да добиеме извештај од сите четири органи, доволно ни е да добиеме од еден. Лицето што во одреден период соработувало, за тоа не добивало пари и нема потпишано документ за соработка. Имаме документи дека соработувал, а тоа што тој отфрла дека бил соработник тоа ќе се докаже. Така беше и со Трендафил Ивановски, прво негираше, па потоа испадна дека бил соработник“, вели Аџиев, кој ја отфрли можноста дека овој процес е политички инструментализиран и одби да каже дали се работи за досието на Милчин.

„Од каде знаете дека се однесува на него, ние не сме му доставиле ништо, ние се обидуваме на едно лице да му доставиме решение, но тоа е недостапно, сега дали е тој или друг, ќе видиме. Не знам дали е тоа досие ’Драматург’, тоа има број, досиејата се водат под број. Ако едно досие добие псевдоним, тоа е друго прашање“, вели Аџиев. (Св.У.)