За десет дена ќе се вози по „Илинденска“

Улицата се асфалтира, а монтирани се и семафорите на раскрсниците

За десетина дена ќе се вози по новиот проширен дел на „Илинденска“, информираат од Градот Скопје. Минатиот викенд започна асфалтирањето на потегот од раскрсницата со улицата „Наум Наумовски-Борче“ до автобуската станица пред раскрсницата со улицата „Рузвелтова“.

Нанесени се израмнувачки слој асфалт со дебелина од 5 до 9 сантиметри и првиот асфалтен слој со дебелина од 7 сантиметри. На посочената делница се вградени околу 2.800 тони асфалт. Деновиве се работи и на доуредување на раскрсницата со „Рузвелтова“ по што ќе следува асфалтирање.

Семафорите кај матичната служба се веќе наместени, а се монтираат и семафорите на раскрсницата кај фонтаната. По должината на булеварот е поставено ново штедливо осветлување, кое треба да профункционира до крајот на неделата.

„Подлогата на тротоарите е веќе бетонирана и се врши подготовка за асфалтирање и доуредување на пешачките патеки. Од другата страна, на улицата се монтира заштитната ограда по должината на градските бараки“, велат во Градот.

По завршувањето на оваа делница, градежните работи ќе продолжат со проширување кон раскрсницата со булеварот „8 Септември“. Истовремено, кога ќе се избере изведувачот, ќе започне и изградбата на уште две ленти на делницата меѓу фонтаната „Лотос“ и Владата. За целосното проширување на булеварот „Илинден“ во градскиот буџет се предвидени 80 милиони денари. (С.Н.)