На Гинекологија почина родилка со бебе

Родилката била во деветти месец од бременоста, имала силна тахикардија и речиси блокирано срце

Јасмина Јовановска


Стручна комисија го испитува случајот со 32-годишна бремена жена која заедно со бебето почина пред три дена на Клиниката за гинекологија. Од што починала точно родилката, не се знае, но се претпоставува дека срцева слабост и' го одзела животот на оваа млада жена. Како што дознаваме, ова се и првичните резултати од обдукцијата. Неофицијални клинички извори, пак, се сомневаат дека е направен лекарски пропуст, иако има и такви лекари што сметаат оти што и да се направело, здравствената состојба на младата мајка била толку тешка што според медицината таквите случаи завршуваат со смрт во првите 24 часа. Комисијата, како што тврдат од клиниката, не е составена поради тоа што не е преземено се' за да се спаси животот на мајката и на бебето, туку така налагале законските процедури. Поради тоа, телото на починатата родилка е дадено на обдукција во Институтот за судска медицина.

Родилката била во деветти месец од бременоста и, како што дознаваме, на клиниката била донесена од Виничко, во многу тешка здравствена состојба. Лекарски извори велат дека пациентката имала животнозагорозувачка тахикардија (срцебиење) и речиси блокирано срце, што било причина таа да биде донесена на клиниката со амбулантно возило како итен случај. Три часа по приемот на родилката, и покрај дадената терапија и консултации со кардиолог, според болнички извори, состојбата не и' се подобрила. Во моментот кога почнала да се влошува и здравствената состојба на плодот, родилката веднаш била однесена во операциона сала за да се породи со царски рез и да се спасат. Но, според неофицијалната приказна, бебето починало една минута откако било донесено на свет. Мајката, која била првородилка, се' уште била жива, но во критична состојба. Деветнаесет часа по царскиот рез, таа починала.

Смртниот случај со родилката ја разбранува клиниката и, како што дознаваме, на стручниот колегиум лекарите меѓусебно почнале да се обвинуваат. Едни лекари велат дека бил направен пропуст зашто родилката ја следела само една лекарка и затоа можеби не успеала да ја спаси. Од клиниката, пак, тврдат дека на секој царски рез има најмалку петмина лекари, а имало и кардиолог и пред царскиот рез и по породувањето. Гинеколозите уште велат дека во вакви ситуации, кога е загрозен животот и на мајката и на плодот, медицинските протоколи налагаат прво да се спаси мајката, па бебето.

Од клиниката не знаат дали мајката била хроничен пациент, зашто била донесена без медицинско досие. Според ги��еколозите, медицинската практиката покажува дека срцева тахикардија која не се смирува со лекови може да ја испровоцира и самата бременост. Можеби мајката страдала од срцево заболување, но не знаела. Но, ако веќе имала срцева болест, тогаш се поставува прашањето дали матичниот гинеколог не требал да ја следи повнимателно и порано да биде испратена на повисоко стручно ниво на клиниката. Уште се зборува дека мајката повеќе години се лекувала од стерилитет, па е можно и хормонските препарати да предизвикале слабост на срцето.

„Пред и постоперативните консултации со кардиолозите поставија сомнение за сериозно срцево засегање. За жал, и покрај сите вложени тераписки и медицински третмани, пациентката почина во првите 24 часа по приемот на Одделението за интензивна нега“, излезе со соопштение д-р Татјана Гуржанова, портпаролка на Клиниката за гинекологија. Таа уште соопшти дека ургентниот царски рез не бил доволен да се спаси и плодот поради исклучително тешката состојба на мајката. Од клиниката ги очекуваат и официјалните резултати од обдукцијата, по што ќе излезат со официјален став за причината за смртта на пациентката.