Германија не може да се освести од трагедијата на Љубовната парада

Полицијата, наводно, го затворила излезот од тунелот и ги враќала оние што се обидувале да влезат кога настанала паника

БЕРЛИН - Германската канцеларка Ангела Меркел побара темелна истрага за смртоносното стампедо на музичкиот фестивал „Парада на љубовта“ во Дуизбург. Меркел изјави дека била шокирана од трагедијата, додавајќи оти мора да се направи се' за да се осигура дека таква несреќа нема да се повтори. Во метежот надвор од тунелот, кај влезот на фестивалот, во саботата загинаа 19 лица, а 340 беа повредени. Преживеаните ги обвинуваат организаторите за жртвите. Тие посочија дека местото било премало и предвидувањата за пренатрупаност биле игнорирани.

Организаторите на фестивалот посочија дека нема да има повеќе „Парада на љубовта“. Германското обвинителство почна кривична истрага за несреќата.

Говорејќи во градот Бајројт, Меркел повторно упати изрази на сочувство до семејствата на загинатите и на повредените, велејќи дека федералната администрација и' понудила целосна поддршка на регионалната власт на Северна Рајна Вестфалија. Таа додаде: „Сега треба темелно да се истражи како ова се случи, бидејќи голем број млади луѓе кои беа восхитени од тоа што ќе одат на таков настан... ќе имаат ужасни сеќавања и треба да се направи се' за да се осигура дека вакво нешто нема да се повтори“.

Организаторот на фестивалот, Рајнер Шалер, изјави дека никогаш повеќе нема да има „Парада на љубовта“, на што Меркел додаде: „Организаторите кажаа дека никогаш повеќе нема да организираат ’Парада на љубовта’, меѓутоа, така големи настани треба да бидат безбедни и федералните држави треба да обезбедат соодветен број полициски сили што ќе го обезбедуваат настанот“.

Шелер на конференцијата за печат во Дуизбург во неделата изјави: „’Парада на љубовта’ отсекогаш била весела и мирна забава, но во иднина секогаш ќе биде засенета од вчерашните настани. Од почит кон жртвите, нивните семејства и пријателите, ние ќе го укинеме организирањето на овој настан во иднина, а тоа значи крај на ’Парада на љубовта’“.

Градоначалникот на Дуизбург, Адолф Сојрленд, изјави дека иако прашањето зошто се случи оваа несреќа е „апсолутно оправдано и мора да биде одговорено“, тој инсистираше на тоа дека додека не се заврши истрагата секое прикачување вина „би било неправедно“. „Тоа нема да им биде од корист на жртвите ниту, пак, на семејствата“, изјави тој додавајќи дека 16-мина од жртвите се идентификувани.

Портпаролот на полицијата подоцна изјави дека најмалку шестмина од жртвите биле странци, од Австралија, Италија, Холандија, Кина, Босна и Шпанија. Тие се на возраст од 20 до 40 години. Сојрленд изјави дека безбедносниот план на фестивалот бил изработен претходно „што не даде никакви причини да се верува дека ќе има некаков проблем“.

Меѓутоа, дописниците јавуваат дека критичарите навеле оти организаторите и полицијата не биле подготвени за толку голем број посетители и самата локација, старата железничка станица била премала и целосно несоодветна. Германските медиуми објавија дека фестивалот привлекол околу 1,4 милиони луѓе. Меѓутоа, бројката е оспорена. Локален официјален претставник одговорен за одговор во итни ситуации, Волфганг Рабе, изјави дека локацијата „може да прифати 300.000 луѓе и во ниту еден момент не била полна“. Списанието „Шпигел“ во неделата објави дека фестивалот имал дозвола за 250.000 посетители.

Првиот човек на главниот полициски синдикат, Рајнер Венд, за весникот „Билд“ изјави дека неговата организација пред една година упатила предупредување дека Дуизбург е „премногу тесен, премногу мал за да се справи со огромна маса луѓе“. Полицијата соопшти дека никој не починал внатре во тунелот.

Полицискиот заменик-началник, Детлеф фон Шмелинг, изјави: „Четиринаесет лица го изгубија животот на металните скали што водат надвор од тунелот, а двајца на ѕидот надвор од тунелот“. Полицијата, наводно, го затворила излезот од тунелот и им кажувала на оние што се обидувале да влезат да се вратат кога настанала паника, иако се' уште не се јасни точните услови во кои се создаде стампедото.

Очевидци на настанот тврдат дека се обиделе да ја предупредат полицијата пред да се случи стампедото оти тунелот е пренатрупан, но посочија дека властите ги игнорирале предупредувањата. Еден жител на Дуизбур, кој запали свеќа за настраданите на местото на несреќата во неделата, изјави: „Ова е голем срам за градот Дуизбург. Кој издаде дозвола за вакво планирање? Треба да летаат глави“.