Нова катна гаража кај Судска палата

За објектот вреден 5 милиони евра, Општина Центар ќе земе кредит од 2,5 милиони евра

Општина Центар не се откажува од идејата за изградба на катна гаража кај Судска палата, иако дел од општинскиот Совет е против овој капитален проект. Градоначалникот Владимир Тодоровиќ наскоро ќе одлучи од која банка ќе земе заем за да го гради објектот, а деновиве ќе биде познато и која фирма ќе ги изведува градежните работи. Според најавите на Тодоровиќ, катната гаража ќе почне да се гради наскоро.

„Градежните работи планираме да ги почнеме по Нова година. Рокот за изградба е до крајот на 2012 година. Според направените процени, објектот максимално ќе биде оправдан, со оглед на тоа дека во тој реон гравитираат неколку административни објекти“, смета Тодоровиќ.

За објектот вреден околу 5 милиони евра, општината планира преку кредит да обезбеди 2,5 милиони, а остатокот ќе ги „извадела“ со продажба на деловниот простор уште во фаза на изградба. Според објаснувањето на градоначалникот, фасадата ќе биде модернистичка со стилски елементи, со цел да се вклопи во околината, имајќи во предвид дека во непосредна близина се гради новиот Кривичен суд, кој ќе има стилски изглед.

Катната гаража ќе биде со капацитет од околу 500 паркинг-места, со бруто развиена површина од речиси 19.000 квадратни метри од кои 1.537 квадрати ќе бидат наменети за деловен простор.

Објектот ќе има пет нивоа над земја, приземје и едно подземно ниво. Деловниот простор ќе се наоѓа на првите три ката, а останатите ќе служат само за паркинг. (Дс.Т.)