Милошоски се сретна со Клинтон во Талин

Талин - Министерот Антонио Милошоски на маргините на состанокот на НАТО и земјите во ИСАФ мисијата во Авганистан во Талин имаше кратка средба со американската државна секретар-ка Хилари Клинтон.

„Разменивме мислења околу најважните работи за Македонија и за регионот и сметам дека за нас е најважно да се најде начин достоинствено да го заземеме своето заслужено место во НАТО. Сметам дека и во интерес на САД е Македонија што побргу да стане полноправна членка на Алијансата“, истакна Милошоски.

Според него, на средбата станало збор за билатералното прашање „преку кое Грција го блокира членството на Македонија во НАТО“. Шефот на македонската дипломатија ја информирал Клинтон за најновите настани и за одредени иницијативи на Македонија за создавање подобра клима за надминување на билатералниот спор за името.

„Стабилноста и развојот на целиот регион, вклучително и на Македонија, не треба да биде оставена или да биде ставена како заложник на еден ваков билатерален проблем или негова злоупотреба за домашни политички цели“, истакна Милошоски.

Тој рече дека ставовите на Клинтон „ги потврдиле очекувањата на Македонија дека приоритет на САД во однос на регионот е што поскоро зачленување не само на Македонија, туку и на другите земји што би ги исполниле условите за членство“. (МИА)