Пронајдена девојката што се удави во Липковското Езеро
КУМАНОВО – По дводневно трагање, нуркачи од специјалната единица на МВР успеаја да го пронајдат телото на дваесет и двегодишната Шеназе Алиу од Матејче, која во петокот си го одзеде животот со давење во Липковското Езеро. Се претпоставува дека Шеназе посегнала по својот живот поради здравствени причини, тешко разочарана по смртта на мајка и'. Единствен очевидец на несреќата бил еден од чуварите на браната, кој, како што изјавува, бил далеку од местото од кое скокнала девојката, поради што не успеал да ја спаси. Насобраните роднини во исчекување на резултат од пребарувањето, завчера беа видно нестрпливи и нервозни од бавноста на потрагата. ,,Пребарувачите не се доволно екипирани. Тоа што дојдоа само со двајца нуркачи упатува на заклучок дека несериозно му приоѓаат на случајот“, велеше чичкото на девојката, Абдула Алиу. Извори на СВР- Куманово вчера соопштија дека пребарувањето на езерото било многу отежнато поради силни струења на ладната вода во липковската акумулација. (Ст.Б.) |
