Едиторијал

Бугарски пасош за „европски рај“

Тамара Грнчароска

Европа на мала врата пак се алармира за можна инвазија на работна сила од Источна Европа овојпат олицетворена во имигранти од Западен Балкан. За разлика од „водоводџиите од Полска“, кои ја преминаа европската граница откако нивната држава стана членка на ЕУ, балканските емигранти, според некои европски медиуми, границата ќе ја поминат затскриени зад двојното државјанство од некоја од земјите од регионот кои веќе е членки на Унијата.

Алармот на европската ксенофобичност пред неколку дена го притисна француски „Фигаро“, кој изнесува фрапантни податоци за баратели на двојно државјанство во регионот. Како најбарани пасоши од жителите на Балканот на тапет, според она што го тврди весникот , се најдоа пасошите на Унгарија и на Бугарија, додека Македонците според нив се едни од најжелните за второ државјанство, и тоа за бугарското. Весникот изнесува фрапантни цифри за тоа колку македонски државјани побарале резервна татковина во нашиот источен сосед, изразувајќи с�� во „десетици илјади“ во изминатите години. Иако по прашањето за Унгарија се изнесуваат најнови статистички податоци за бројот на поднесени барања добивање нејзин пасош, за Бугарија се изнесуваат податоци со кои во основа се актуелизираат старите бројки со кои со години наназад оперира официјална Софија.

Додека за Унгарија за знае дека само во јануари оваа година се поднесени 4.000 барања за пасоши, со предвидување на властите во Будимпешта дека таа бројка до крајот на годината ќе се искачи на 250.000, за Бугарија се вртат старите податоци, како на пример дека само во 2004 година за бугарски пасош аплицирале 40.000 Македонци. Од илјадниците барања од 2001 година до денес Бугарија одобрила 20.000 државјанства.

Податокот, иако не е нов и никогаш официјално потврден од македонските власти, повторно ставен на хартија, звучи фрапантно и поразително за македонската држава и за нејзините граѓани. А токму тивкиот одговор кој повеќе наликува на молк од македонските власти за бројките со кои се расфрла Бугарија за припадници на бугарската етничка заедница во Македонија, уште повеќе им дава тежина на ваквите информации.

Втора работа која произлегува од текстот на „Фигаро“ и од она што го пренесуваат „Новините“ е дека бугарските или унгарските пасоши се бараат поради галопирачката сиромаштија која го притиска регионот. Потрагата по подобра егзистенција ги прави резервните пасоши од некоја држава од ЕУ исплатлива инвестиција кога ќе се дојде до емигрантските власти во некоја од европските држави, но тоа истовремено е пораз за економската политика на балканските држави. Неуспехот за социјално јакнење на положбата на граѓаните е првиот предуслов за барање излез во поседување „туѓ“ пасош. Во тој контекст „Фигаро“ прецизно ја отсликува добрата волја на Софија за лесно делење бугарски пасоши на Македонци. Процедурата која ја предвидува Бугарија им овозможува на сите Македонци со словенско потекло да аплицираат за бугарски пасош.

И доколку ваквите текстови на европските медиуми можат да ја растревожат нивната јавност од можен нов бран на „водоинсталатери и берачи на јагоди од исток“, истите треба да ја растревожат и нашата јавност, а пред се државна политика од се поголем бран на иселување од Македонија под превезот на двојните државјанства. Ако не не алармираше анкетата во која над 60 проценти од средношколците изразиле желба да ја напуштат Македонија, тогаш дефинитивно треба да се запали црвеното светло кога и средната старосна популација со втор пасош бара начини да замине од „македонскиот рај“.