Ахмети добро се испазари со Груевски

Сопартијци на Ахмети ќе им ги земат столчињата на Миле Јанакиески, Трајко Вељаноски, Љупчо Тодоровски

Светлана Унковска
Жаклина Ѓорѓевиќ

Завршување на музејот на Кале и изградба на црква во центарот на Скопје во замена за затворање на хашките случаи и решавање на статусот на борците на ОНА. Таков договор, наводно, бил постигнат меѓу коалициските партнери ВМРО-ДПМНЕ и ДУИ. Вчера никој од двете партии не сакаше ниту да ги потврди ниту да ги демантира ваквите информации, бидејќи и натаму стоеле на принципот да не зборуваат ништо за преговорите додека не се постигне договор.

Според неофицијални информации, за лидерот на ВМРО-ДПМНЕ, Никола Груевски, било многу важно да ги истурка проектите од „Скопје 2014“, меѓу кои е и музеј-црквата на Кале, околу чија изградба во февруари се случи сериозен инцидент. Оттука станува јасна и политиката на ДУИ, чии членови и функционери тогаш насилно го уриваа објектот и не дозволуваа да се изгради, така што тој стана дел од коалициските преговори. Исто така, било договорено ДУИ да не се спротивставува на изградбата на црквата. Но, дознаваме дека партискиот лидер, Али Ахмети, ги условил коалициските партнери да се откажат од идејата таа да биде на плоштадот, туку да се избере друга локација. Ахмети го објаснил тоа со фактот дека би можело да се случи повторно да има протести од албанската етничка заедница и дека притоа повторно ќе бараат заедно со црквата да се гради и Бурмали џамија. Груевски, наводно, бил принуден да се согласи и за тоа, па како алтернативен простор бил избран паркот кај Спомен-куќата на Мајка Тереза, пред Домот на АРМ.

ДУИ, како што тврдат нашите извори, за возврат добила ветување дека во најкус можен рок по формирањето на Владата ќе бидат затворени хашките случаи, кои за интегративците се една од најболните точки. Во истиот пакет е и решавањето на статусот и обезбедување пензии за борците на поранешна ОНА. Во претходниот мандат ДУИ не успеа да го истурка тоа. Но, Ахмети не сакал да остави се' на случајот, па затоа инсистирал прво да се затворат прашањата што ги бара ДУИ, а дури потоа би се почнале проектите на ВМРО-ДПМНЕ со музејот и црквата.

Дознаваме и дека во меѓупартиските преговори било договорено местото шеф на парламентот, дефинитивно, да го добие ДУИ, но дознаваме и дека во ВМРО-ДПМНЕ не биле многу расположени потпретседателката на интегративците, Теута Арифи, да седне во првата собраниска фотелја, поради нејзините отворени критики за владините потези во претходниот мандат. Како едно од можните решенија, покрај Ермира Мехмети, се спомнува и Џевад Адеми. ВМРО-ДПМНЕ го преферира Адеми бидејќи како претседател на Комитетот за меѓуетнички односи успешно изигра да не се одржат седниците на кои требаше да се отворат многу жешки теми, како проектите „Скопје 2014“, македонски јазик за албанските првачиња...

Од кадровските комбинаторики се шпекулира дека Горан Трајковски, првиот човек на Управата за јавни приходи, ќе дојде на местото на министерката за внатрешни работи, Гордана Јанкулоска, која, пак, најверојатно, ќе ротира во ресорот правда. Како имиња за првата позиција во полицијата се вртат и началникот на штипската полиција Ѕвонко Каширски и актуелниот министер за образование, Никола Тодоров, за кој, исто така, се шпекулира дека би можел да биде испратен за амбасадор, иако самиот коментира дека дипломатијата за него не е предизвик.

Но, еден од најновите моменти во преговорите е тоа што ДУИ, според нашите извори, најверојатно, ќе го добие Бирото за јавна безбедност, каде што се слеваат информации за сите форми на организиран криминал, безбедност во државата, граничната полиција, потоа информациите за државјаните, пасошите, личните карти, сите форми на лични документи. Во ресорот полиција, како и досега, се шпекулира дека ќе го задржат досегашното заменичко место, но, можеби, со друга политичка фигура.

Како сигурно се смета дека Министерството за транспорт и врски го губи ВМРО-ДПМНЕ, а го добива ДУИ. Досега на негово чело беше Миле Јанакиески, но неговото име досега не се спомнува во кроењето на идните министерски места. Сепак, „битката“ во овој ресор се' уште трае во меѓукоалициските преговори, бидејќи ВМРО-ДПМНЕ инсистира да ги задржат клучните фондови на Министерството каде што најмногу се вртат парите. ДУИ, според неофицијални информации, ќе го добие министерското место во одбраната, а се' поизвесно е дека ќе ги задржи и економија и труд и социјална политика, но не се знае дали тоа ќе бидат истите личности што и досега раководеа со овие ресори.

Конечната распределбата на ресорите меѓу коалициските партнери ВМРО-ДПМНЕ и ДУИ се очекува да биде позната денеска или најдоцна утре.