ЕДИТОРИЈАЛ
Сопки за Скопје
Билјана Ангеловска
Скопјани имаат полно право да им се лутат на државните органи кои прават се' да ги спречат проектите што се од капитално значење за градот. И на институциите кои би требало да се независни, но за жал, дејствуваат како продолжена рака на Владата, па измислуваат секакви (не)издржани причини да ја стопираат реализацијата на идеите на градоначалникот Трифун Костовски.
Кој, всушност, прави сопки за Скопје? Кои се мотивите и со каква цел?
Наместо да се даде максимална поддршка за воведувањето трамвај во јавниот градски превоз, Антикорупциската комисија прави се' да ја запре реализацијата на веќе изготвениот проект. Во отсуство на релевантни аргументи се измислуваат недоследности за да се запре распишаниот тендер. Најавите за кривично гонење поради одбивањето на градоначалникот да го поништи распишаниот тендер, антикорупционерите ги објаснуваат со изборниот процес. Притоа, претстојните избори ги врзуваат со обемноста на тендерот поради што, како што велат, неговата реализација токму сега е недозволива.
Истовремено, три пати се поништува тендерот за набавка на нови автобуси. Последниот пат, кога се мислеше дека скопјани конечно ќе добијат нови автобуси, бидејќи надлежните изјавуваа дека светски познати фирми се заинтересирани за двокатни автобуси, се покажа дека светските производители, всушност, биле две кинески, од кои едната во конзорциум со бугарска фирма, една словачка и една домашна компанија. Но, иако реално никој и не очекуваше светски бренд да се заинтересира за Скопје, пропадна и тој тендер.
Објаснувањата, исто како и за трамвајот, беа недоволно убедливи. Оти јавна тајна беше дека тендерот се токми за фирма што ја преферира државата. Но, откако се покажа дека тоа тешко може да се изведе безболно, работата пак се врати на почеток. Да му дозволеше Владата на Костовски уште лани да се задолжи за да купи нови автобуси, сега веќе тој проблем ќе беше симнат од дневен ред. Вака, и натаму останува нерешен.
Веќе станува дегутантно да се зборува за квалитетот на јавниот превоз во главниот град. Последниов снег уште еднаш покажа што значи за Скопје отсуството на квалитетен, брз и безбеден јавен превоз. Колоните возила заглавени на подмрзнатите сообраќајници се најдобар доказ дека на градот му е повеќе од потребен трамвајски систем.
Но, очигледно никој не сака да ги продолжи проектите на Костовски. И Владата и Антикорупциска прават се' да ја запрат реализацијата на трамвајот додека не дојде новиот градоначалник. Тој, пак, може ќе го продолжи проектот, а можеби и не. Факт е дека Костовски не влегува во изборната трка, тој нема политичка партија зад себе, па нема ни свои членови, што значи, во иднина нема да може никако да влијае на одлуката да се гради трамвај или не.
Сизифовска работа го чека новиот градоначалник доколку сака главниот град да го направи пристојно место за живеење, а се' да почне одново. Или можеби ќе биде доволно доблестен да ги продолжи проектите што ги иницираше Трифун Костовски.
И за трамвајот и за автобусите. Не би требало да има проблем да се купат автобусите, бидејќи никој не очекува Владата да се повлече од понудената помош. Но, идниот градски татко никако не смее да се откаже од трамвајот, оти тоа е најкапиталниот проект што го имал Скопје досега.
Ако со тоа се реши проблемот со јавниот превоз во главниот град, никој нема да му забележи што бил проект на претходниот градоначалник. Напротив. Скопјани ќе му бидат благодарни и иако евентуално воведениот шински сообраќај ќе го паметат како трамвајот на Трифун, заслугите за неговата реализација ќе му ги припишат на новиот градоначалник, па како и да се викал тој: Коце, Тито, Лазе... |
