Холанѓанец претепан во Белград, оти пеел „Македонско девојче“

Во главниот град на Србија две момчиња претепале холандски државјанин без никаква причина

Холандски државјанин со словенечко потекло бил претепан во центарот во Белград, по што со тешки повреди бил пренесен во болница. Триесет и четиригодишниот Холанѓанец бил нападнат од две момчиња, пишуваат српските медиуми. Тамошната полиција уапси еден од напаѓачите, против кого е поднесена кривична пријава. Според претепаното момче, тој бил нападнат без никаква причина, односно затоа што одејќи по улица, ја пеел песната „Македонско девојче“.

Порталот Б-92 објави дека инцидентот се случил во неделата околу полноќ во близина на хостел во Нов Белград, кога Денис Брезавшчек бил пресретнат од две момчиња. „Ме прашаа ‘од каде си, не си одовде, од каде си‘. Им реков дека сум од Холандија и станаа агресивни спрема мене. Одев кон хостелот и ја пеев ‘Македонско девојче‘ и веројатно не им се допадна тоа“, вели Брезавшчек.

Според неговото кажување, двете момчиња го турнале на земја и го шутирале се' додека не наишле двајца полицајци, по што почнале да го молат да не ги пријавува. Брезавшчек ги повикал своите пријатели, кои го однеле во Ургентниот центар, каде му биле констатирани скршеница на левата бутна коска, поради што е задржан на лекување. Од Ургентниот центар известија дека неговата здравствена состојба е стабилна.

Еден час по инцидентот, белградската полиција го уапси 21-годишниот Ѓуро Р., кој го предизвикал инцидентот. Против него е поднесена кривична пријава, пишуваат српските медиуми. (Г.А.)