Што прават денеска

Кристијан Стефановски

менаџер

Деновиве сум целосно посветен на подготовките околу најновото издание на летниот фестивал „Скрим“, што ќе се одржи на 31 јули на плажата „Парк“ во Охрид. Засега се потврдени настапите на „Прљаво казалиште“, „Дивље јагоде“, ЕКВ и „Морал“, а во преговори сме со уште неколку групи. Во секој случај, ќе има уште изненадувања...

Билјана Јанкуловска

портпаролка во ЈСП

Понеделнички ме очекува утринскиот колегиум во претпријатието, а по него и гостување во емисијата „Раноден“ на телевизија А1. По враќањето следуваат вообичаените работни обврски, меѓу кои за денеска е планирана и регистрацијата на новите автобуси на ЈСП. Во попладневните часови одам на прошетка и кафе со пријателите.

Влатко Лозаноски-Лозано

пејач

Во последниов период цело внимание ми е насочено кон подготовките и снимањето на песните што ќе се најдат на мојот нов албум, кој ќе излезе кон крајот на годинава. Во план се и неколку соработки со големи музички имиња од македонската сцена, но и од соседството. Остатокот од времето е резервиран за интервјуа по повод излегувањето на новата песна „Кога мене ќе ме немаш“.